የኮርፖሬሽኑ የሀዋሳ ቅርንጫፍ ጽ/ቤት በሦስት ክልሎች በኮንትራት እርሻዎች ምርጥ ዘር እያባዛ ነው

አዲስ አበባ፣ ጥቅምት 8 ቀን 2015 ዓ.ም (ኢግሥኮ)፡- በኢትዮጵያ የግብርና ሥራዎች ኮርፖሬሽን የሀዋሳ ቅርንጫፍ ጽ/ቤት በሦስት ክልሎች በኮንትራት እርሻዎች የተለያዩ ሰብሎች ምርጥ ዘር እያባዛ ይገኛል፡፡

የቅርንጫፍ ጽ/ቤቱ ሥራ አስኪያጅ አቶ አድማሱ አናጋው እንዳስታወቁት፣ ጽ/ቤቱ በተያዘው የ2014/15 የመኸር ወቅት በኮንትራት አባዥ ሰፋፊ የባለሃብት እርሻዎች፣ በመንግሥት የግብርና ተቋማት እና በአርሶ አደር ማሳዎች ላይ በኦሮሚያ ክልል ምዕራብ አርሲ እና ምስራቅ ሸዋ ዞኖች፣ በደቡብ ብሔር ብሔረሰቦችና ሕዝቦች ክልል በጉራጌ፣ ስልጤ፣ ወላይታ፣ ሃድያ እና ሃላባ ዞኖች እንዲሁም በሲዳማ ክልል በድምሩ በስምንት ዞኖች በ2 ሺህ 34 ሄክታር መሬት ላይ የተለያዩ የሰብል ዝርያዎችን ምርጥ ዘር በማባዛት ላይ ይገኛል።

በዋናነት የስንዴ፣ ጤፍ፣ በቆሎ እና ቦለቄ ሰብሎችን ምርጥ ዘር እያባዛን ነው ያሉት አቶ አድማሱ፣ በዚህም 45 ሺህ 752 ኩንታል ዘር እንደሚገኝ ይገመታል ብለዋል፡፡

ዘር በከፍተኛ ጥንቃቄ ተመርቶ ለተጠቃሚዎች እንደሚቀርብ የገለጹት አቶ አድማሱ፣ ከዚህ አኳያ ከማሳ መረጣ ጀምሮ ምርት ተሰብስቦ መጋዘን እስኪገባ ድረስ የክትትልና የጥራት ቁጥጥር ሥራዎችን በመስክ በመገኘት እያከናወኑ መሆኑን አስረድተዋል።

የተለያዩ የሰብል ዘሮችን በማባዛት በመላ ሀገሪቱ እንደሚያሰራጩ የገለጹት ሥራ አስኪያጁ፣ በዚህ ወቅት እየተባዛ የሚገኘውን ምርጥ ዘር ጽ/ቤቱ በሀዋሳ ከተማ ባሉት ሁለት የዘር ማዘጋጃ ማሽኖች በማበጠርና በማዘጋጀት ለተጠቃሚዎች ለማቅረብ ቅድመ ዝግጅት እያደረገ እንደሚገኝ አስታውቀዋል።

አክለውም ቅርንጫፍ ጽ/ቤቱ በሻሸመኔ ከተማ ባለው የሽያጭ ማዕከል አማካኝነት የአፈር ማዳበሪያ፣ አግሮኬሚካሎች እና የእንስሳት መድሃኒቶችን ለአርሶአደሩ በቅርበት እያደረሰ መሆኑን ተናግረዋል።

በሌላ በኩል አርሶ አደሩ ከግብርና ምርምር የወጡ አዳዲስ የሰብል ዝርያዎችን እንዲጠቀም ለማስቻል በተለያዩ አካባቢዎች የሰርቶ ማሳያ እና የአርሶ አደሮች በዓል በማዘጋጀት ዝርያዎቹን የማስተዋወቅ ሥራ በትኩረት እየተከናወነ መሆኑን አመልክተዋል፡፡

• 

• 

### ግብርናን ማዘመን ግባችን ነው!

በኮርፖሬሽኑ የጎንዴ ኢተያ መስራች ዘር ማባዣ እርሻ ልማት እና በኮንትራት እርሻዎች ከ111 ሺህ ኩንታል በላይ ምርት ይጠበቃል

አዲስ አበባ፣ ጥቅምት 11/2015 ዓ.ም (ኢግሥኮ) በኢትዮጵያ የግብርና ሥራዎች ኮርፖሬሽን በአሰላ ቅርንጫፍ ጽ/ቤት አማካኝነት በጎንዴ ኢተያ መስራች ዘር ማባዣ እርሻ ልማት እንዲሁም በሰፋፊ የባለሃብትና የአርሶ አደር የኮንትራት እርሻዎች በዘር ከተሸፈነው 3 ሺህ 15 ሄክታር መሬት ከ111 ሺህ ኩንታል በላይ ምርት እንደሚጠበቅ ተገለጸ፡፡

የቅርንጫፍ ጽ/ቤቱ ሥራ አስኪያጅ አቶ ብርሃኑ የሺጥላ እንደገለጹት፣ ቅርንጫፍ ጽ/ቤቱ የራሱ እርሻዎች በሆኑት የጎንዴ ኢተያ እንዲሁም በሰፋፊ የባለሃብት እርሻዎች እና በአርሶ አደር ማሳ የ11 ሰብል ዓይነቶች 38 ዝርያዎች እየተባዙ ይገኛሉ፡፡

በ2014/15 የመኸር ወቅት 1 ሺህ 561 ሄክታር መሬት በዘር ለመሸፈን ታቅዶ 3 ሺህ 15 ሄክታር በዘር ለመሸፈን ተችሏል ያሉት አቶ ብርሃኑ፣ በዚህም ከ111 ሺህ ኩንታል በላይ ምርት ይገኛል ተብሎ እንደሚጠበቅ አስታውቀዋል፡፡

የዘር ብዜት ሥራው በኦሮሚያ ክልል ምስራቅ ሸዋ እና አርሲ ዞኖች እየተካሄደ እንደሚገኝ የገለጹት ሥራ አስኪያጁ፣ በዋናነት በቢሾፍቱ፣ ወንጂ፣ ባቱ፣ በቆጂ እና ዴራ አካባቢዎች ባሉ ሰፋፊ እርሻዎችና ማሳዎች እንደሆነ ጠቁመዋል፡፡

በአሁኑ ወቅት በአበባ ደረጃ ያለ፣ ፍሬ መያዝ የጀመረ እና የደረሰ ሰብል አለ ያሉት አቶ ብርሃኑ፣ በወንጂ ሸዋ ስኳር ፋብሪካ የተዘራው የስንዴ ሰብል በመድረሱ እየተሰበሰበ ይገኛል ብለዋል፡፡

በሌላ በኩል በአሰላ ከተማ በሚገኘው የቅርንጫፍ ጽ/ቤቱ ዘር ማዘጋጃ ማሽን ለግብርና ምርምር ተቋማት፣ ለዘር አባዥዎች እና ለሌሎች ተጠቃሚዎች የዘር ብጠራ አገልግሎት እየሰጡ መሆኑን አብራርተዋል፡፡

አክለውም የአፈር ማዳበሪያ፣ የአግሮኬሚካሎች እና የዘር ሽያጭ እያከናወኑ እንደሚገኙ ገልጸዋል፡፡

በኢትዮጵያ የግብርና ሥራዎች ኮርፖሬሽን (ኢግሥኮ) ስር የሚተዳደረው የአሰላ ቅርንጫፍ ጽ/ቤት በ1973 ዓ.ም የተቋቋመ ሲሆን፤ በራሱ የመስራች ዘር ማባዣ እርሻ ጣቢያ እና በኮንትራት እርሻዎች እያባዛ ከሚገኘው ዘር በተጨማሪ ለአርሶ አደሩ፣ ለባለሃብቶች እና ለልማት ድርጅቶች የግብርና ማሳደጊያ ግብዓቶችን እያቀረበ ይገኛል፡፡

• 

• 

• 

• 

• 

### ግብርናን ማዘመን ግባችን ነው!

ኮርፖሬሽኑ ከአርዳይታ እርሻ ልማት ከ85 ሺህ ኩንታል በላይ ምርጥ ዘር ይጠብቃል

አዲስ አበባ፣ ጥቅምት 15/2015 ዓ.ም. (ኢግሥኮ):- በኢትዮጵያ የግብርና ሥራዎች ኮርፖሬሽን ስር ከሚተዳደሩት እርሻዎች አንዱ በሆነው የአርዳይታ ምርጥ ዘር ማባዣ እርሻ ልማት ከ85 ሺህ ኩንታል በላይ ምርጥ ዘር ይሰበሰባል ተብሎ እንደሚጠበቅ ተገለጸ፡፡

የአርዳይታ ቅርንጫፍ ጽ/ቤት ሥራ አስኪያጅ አቶ ፍቃዱ ከበደ እንደገለጹት፣ በ2014/15 የመኸር ወቅት 3 ሺህ 70 ሄክታር መሬት በቅድመ መስራች፣መስራች እና የተመሰከረለት ዘር ደረጃዎች መሸፈን ተችሏል፡፡

ከዚህ ውስጥ 2 ሺህ 360 ሄክታር በስንዴ፣ 612 ሄክታር በጎመን ዘር፣ 67 ሄክታር በገብስ እና 31 ሄክታር በባቄላ ዝርያዎች መሸፈኑን አስረድተዋል፡፡

በአሁኑ ወቅት አብዛኛው ሰብል በእሸት እና አበባ ደረጃ ይገኛል ያሉት ሥራ አስኪያጁ፣ የሰብሎቹ ሁኔታ በጥሩ ደረጃ ላይ እንደሚገኝ ጠቁመው፣ የተለየ ተፈጥሮአዊ ችግር ካላጋጠመ በስተቀር ያቀዱትን ከ85 ሺህ ኩንታል በላይ ምርት እንደሚያሳኩ አስታውቀዋል፡፡

የአርዳይታ ቅርንጫፍ ጽ/ቤት በቅድመ መስራች፣ መስራች እና የተመሰከረለት የዘር ደረጃ 33 የስንዴ፣ ዘጠኝ የገብስ፣ አንድ የባቄላ እና አንድ የጎመን ዘር ዝርያዎችን እያባዛ ይገኛል፡፡

በሌላ በኩል ቅርንጫፍ ጽ/ቤቱ ማኅበራዊ ኃላፊነትን ከመወጣት አንጻር ለአካባቢው ነዋሪዎች የተለያዩ ድጋፎችን እና ትብብሮችን እያደረገ እንደሚገኝ የገለጹት አቶ ፍቃዱ፣ ለአካባቢው አርሶ አደሮች ዘር ከመሸጫ ዋጋ አምስት በመቶ ቅናሽ በማድረግ እያቀረቡ መሆኑን ተናግረዋል፡፡

ከዚህ በተጨማሪ በየዓመቱ በአረም እና ምርት መሰብሰቢያ ወቅት ከ800 እስከ 1000 ለሚሆኑ የአካባቢው ነዋሪዎች የሥራ እድል እንደሚፈጠርም አስረድተዋል፡፡

ተረፈ ምርትን ወይም የሰብል ገለባን በማኅበር ለተደራጁ የአጎራባች ቀበሌ ሥራ አጥ ወጣቶች በመስጠት ተጠቃሚ እንዲሆኑ እየተደረገ ያለውን ድጋፍም አመልክተዋል፡፡

ከዚህ ባሻገር በቅርንጫፍ ጽ/ቤቱ ክሊኒክ ለአካባቢው ነዋሪዎች በቅናሽ ዋጋ የመጀመሪያ ደረጃ ህክምና እርዳታ፣ ነጻ የማዋለድ እና የአምቡላንስ አገልግሎት ድጋፍ እየተሰጠ መሆኑንም አክለው አስታውቀዋል፡፡

የአርዳይታ ምርጥ ዘር ማባዣ እርሻ ልማት ኮርፖሬሽኑ በስሩ ካሉት እርሻዎች መካከል በስፋት ትልቁ ሲሆን፣ መገኛውም በኦሮሚያ ክልል ምዕራብ አርሲ ዞን ገደብ አሳሳ ወረዳ ነው፡፡

### ግብርናን ማዘመን ግባችን ነው!

ኮርፖሬሽኑ የምርጥ ዘር አቅርቦትን ለማሳደግ ከባለሃብቶች ጋር እየሰራ ነው

አዲስ አበባ፣ ጥቅምት 17 ቀን 2015 ዓ.ም (ኢግሥኮ)፡- የኢትዮጵያ የግብርና ሥራዎች ኮርፖሬሽን ለተጠቃሚዎች የሚያቀርበውን ምርጥ ዘር በጥራትና በመጠን ለማሳደግ በኮንትራት ሰፋፊ እርሻዎች ከባለሃብቶች ጋር እየሰራ ነው።

የይስሃቅ ሳምሶን እርሻ ልማት እና የዱቄት ፋብሪካ ባለቤት አቶ ይስሃቅ ሳምሶን ከኮርፖሬሽኑ ጋር ምርጥ ዘር ማባዛት ከጀመሩ ሶስት ዓመት እንደሆናቸው ገልጸው፣ በዚህ ዓመት ከኮርፖሬሽኑ ኮፈሌ ቅርንጫፍ ጽ/ቤት ጋር ውል በመግባት በኦሮሚያ ክልል ምስራቅ ባሌ ዞን ጊኒር እና ጃራ ወረዳዎች 210 ሄክታር መሬት በሰብል በመሸፈን ዘር እያባዙ መሆኑን ገልጸዋል፡፡

” ኮርፖሬሽኑ ባለሞያዎችን እየላከ ድጋፍና ክትትል ስለሚደርግልን ምርታማነታችን ከፍ እንዲል አድርጓል” ያሉት አቶ ይስሃቅ፣ በትብብር መስራታቸው ምርታማነታቸውን በመጨመሩ ወደፊትም ከኮርፖሬሽኑ ጋር መስራት ምርጫቸው እንደሆነ ተናግረዋል፡፡

አክለውም ሰፊውን አርሶ አደር ዘር በማባዛት ለመጥቀም እና በምላሹም ለዱቄት ፋብሪካቸው ግብዓት የሚሆን ምርት ከአርሶ አደሩ ለመሰብሰብ የዘር ብዜት ሥራ ውስጥ መግባታቸውን አብራርተዋል፡፡

ሌላኛው የቡላላ ዲኒቂቲ እርሻ ሥራ አስፈጻሚ አቶ መኮንን ጸጋየ የተሻለ ዘር በማምረት መንግሥትን እና ሕዝብን ለመደገፍ በሚል ሃሳብ ዘር በማባዛት ሥራ ላይ መሰማራታቸውን ጠቁመው፣ ከ1995 ዓ.ም ጀምሮ አሁን በኮርፖሬሽኑ ስር ከሚገኘው የኢትዮጵያ ምርጥ ዘር ድርጅት ጋር ውል በመግባት ዘር እያባዙ እንደሚገኙ አስታውቀዋል፡፡

እንደ ሥራ አስፈጻሚው ገለጻ፣ በ2014/15 የመኸር ወቅት ከኮፈሌ ቅርንጫፍ ጽ/ቤት ጋር ውል በመግባት በምስራቅ ባሌ ዞን ጊኒር እና ጎሎልቻ ወረዳዎች ከ1 ሺህ 200 ሄክታር በላይ መሬት ላይ የተለያዩ የሰብል ዝርያችዎችን በማባዛት ላይ ናቸው ።

የኮርፖሬሽኑ ባለሞያዎች ከእርሻ ሥራ ጀምሮ ምርት እስኪሰበሰብ ድረስ ከእኛ ጋር ናቸው ያሉት አቶ መኮንን፣ ከኮርፖሬሽኑ ጋር በመስራታቸው ትርፋማ መሆናቸውን መስክረዋል፡፡ በተጨማሪም ያባዙትን ምርት ኮርፖሬሽኑ በራሱ ትራንስፖርት እና ከረጢት እንደሚረከባቸው ገልጸዋል፡፡

በዚህ ዓመት ከሌላው ጊዜ የተሻለ የዝናብ ሥርጭት መኖሩን የተናገሩት አቶ መኮንን፣ ሰብሉ በጥሩ ደረጃ ላይ እንደሚገኝና ጥራት ያለው ዘር አባዝተው ለኮርፖሬሽኑ ለማስረከብ እየሰሩ መሆናቸውን አስታውቀዋል፡፡

በሜድሮክ ኢንቨስትመንት ግሩፕ ኤልፎራ አግሮ ኢንዱስትሪ የኤልፎራ ነትሌ እርሻ ሥራ አስኪያጅ አቶ በኃይሉ ምትኩ በበኩላቸው፣ እንደ ሀገር ያለውን የበቆሎ ዘር እጥረት ለመቅረፍ እና በግብርናው ዘርፍ የራሳቸውን አስተዋጽዖ በማበርከት ማኅበራዊ ኃላፊነታቸውን ለመወጣት ከኮርፖሬሽኑ የሀዋሳ ቅርንጫፍ ጽ/ቤት ጋር በመተባበር 120 ሄክታር መሬት ላይ በቆሎ እያለሙ እንደሚገኙ አስረድተዋል፡፡

ከኮርፖሬሽኑ ጋር የቆየ ግንኙኘት እንዳላቸው የተናገሩት አቶ በኃይሉ፣ ከዚህ አኳያም ኮርፖሬሽኑን እንደራሳቸው ድርጅት እንደሚቆጥሩት ገልጸዋል፡፡ አያይዘውም ከ2002 ዓ.ም ጀምሮ ከኮርፖሬሽኑ ጋር የተለያዩ ሰብሎችን ዘር እያባዛን እንገኛለን ብለዋል።

ምርጥ ዘር፣ የአፈር ማዳበሪያ እና አግሮኬሚካሎችን ኮርፖሬሽኑ እንደሚያቀርብላቸው ገልጸው፣ የሜካናይዜሽን አገልግሎት በመስጠትም የኤልፎራ ነትሌ መሬትን ለእርሻ ዝግጁ ማድረጉን ጠቁመዋል፡፡

ኮርፖሬሽኑ ግብርናን በማዘመን ምርትና ምርታማነትን ለማሳደግ እያደረገ ያለው ዘርፈ ብዙ የልማት ሥራ ለወገንም ሆነ ለሀገር በጣም ጠቃሚ ነው ያሉት ሥራ አስኪያጁ፣ ወደፊትም ከኮርፖሬሽኑ ጋር መስራታችንን እንቀጥላለን ብለዋል፡፡

የኢቲኤም ጠቅላላ የግብርና ሥራ ባለቤት አቶ መስፍን ነጋሽ በበኩላቸው፣ የተለያዩ ሰብሎችን ምርጥ ዘር በብዛትና በጥራት በማባዛት ለአካባቢው አርሶ አደሮች ዘር ለማቅረብ የዘር ብዜት ሥራን በ1994 ዓ.ም መጀመራቸውን ገልጸዋል፡፡

በአሁኑ ወቅት ከኮርፖሬሽኑ የአሰላ ቅርንጫፍ ጽ/ቤት ጋር በመተባበር በኦሮሚያ ክልል ምስራቅ ሸዋ ዞን አድአ ወረዳ በ76 ሄክታር መሬት ላይ ጤፍ እና ሽንብራ እያባዙ እንደሆነ ተናግረዋል፡፡

“ከኮርፖሬሽኑ ጋር እንደ ቤተሰብ ነው ተባብረን የምንሰራው” ያሉት አቶ መስፍን፣ የአሰላ ቅርንጫፍ ጽ/ቤት ከእርሻ ማሳ ዝግጅት ጀምሮ ምርት እስኪሰበሰብ ድረስ ክትትል እንደሚያደርግላቸው እና ለሚያጋጥማቸው ችግርም መፍትሔ እንደሚሰጣቸው አስታውቀዋል፡፡

ከዚህ አኳያ ከኮርፖሬሽኑ ጋር በመስራታቸው ውጤታማ መሆናቸውን የሚናገሩት አቶ መስፍን፣ በ2007 ዓ.ም ከቀድሞ ጠቅላይ ሚኒስትር ኃይለማርያም ደሳለኝ እጅ በምርጥ ዘር ብዜት ሥራ የመንግሥት አጋዥ በመባል ሽልማት መቀበላቸውን አስታውሰዋል።

የኢትዮጵያ የግብርና ሥራዎች ኮርፖሬሽን ከራሱ እርሻዎች በተጨማሪ በኮንትራት አማካይነት በሰፋፊ የመንግሥትና የባለሃብት እርሻዎች እንዲሁም በአርሶ አደሮች ማሳዎች ላይ ዘር በማባዛት እና በማዘጋጀት ለተጠቃሚዎች እያቀረበ የሚገኝ የመንግሥት የልማት ድርጅት ነው፡፡

### ግብርናን ማዘመን ግባችን ነው!

ኮርፖሬሽኑ በተጠናቀቀው በጀት ዓመት ከ62 ቢሊዮን ብር በላይ ዋጋ ያላቸውን የግብርና ምርት ማሳደጊያ ግብዓቶችን ለተጠቃሚዎች አቅርቧል

የኢትዮጵያ የግብርና ሥራዎች ኮርፖሬሽን በ2014 በጀት ዓመት ከ62 ቢሊዮን ብር በላይ ዋጋ ያላቸውን የግብርና ምርት ማሳደጊያ ግብዓቶችን ለተጠቃሚዎች አቅርቧል፡፡

በኮርፖሬሽኑ የግብርና ምርት ማሳደጊያዎች አቅርቦት ዘርፍ ሥራ አስፈጻሚ አቶ ሰለሞን ገብሬ እንደገለጹት፣ በተጠናቀቀው በጀት ዓመት ኮርፖሬሽኑ ምርትና ምርታማነትን የሚጨምሩ የአፈር ማዳበሪያ፣ የሰብል ተባይ ማጥፊያ አግሮኬሚካሎች እና ኬሚካል መርጫ መሣሪያዎችን ከዓለም አቀፍ አቅራቢዎች በመግዛት ለተጠቃሚዎች ማቅረብ ችሏል፡፡

በዚህ መሰረት ለ2014/15 የሰብል ዘመን የሚውሉ 61 ቢሊዮን ብር የሚጠጋ ዋጋ ያላቸው 12 ሚሊዮን 876 ሺህ 620 ኩንታል ዩሪያ፣ ኤን ፒ ኤስ እና ኤን ፒ ኤስ ቢ የአፈር ማዳበሪያዎች ለአርሶ አደሮች፣ ለከፊል አርብቶ አደሮች እና በግብርናው ዘርፍ ለተሰማሩ ባለሃብቶች መቅረቡን ነው ሥራ አስፈጻሚው ያስታወቁት፡፡

በተጨማሪም ከ1 ቢሊዮን ብር በላይ ዋጋ ያላቸው ፈሳሽ እና ዱቄት አግሮኬሚካሎች እና 3 ሺህ 870 የኬሚካል መርጫ መሣሪያዎች ለተጠቃሚዎች ተደራሽ መደረጋቸውን አቶ ሰለሞን ተናግረዋል፡፡ እንዲሁም 58 ሚሊዮን ብር የሚጠጋ ዋጋ ያላቸው የእንስሳት መድሃኒቶች ሽያጭ መከናወኑንም ገልጸዋል፡፡

በአሁኑ ወቅት ከ5 ቢሊዮን ብር በላይ ዋጋ ያላቸው የአፈር ማዳበሪያ እና አግሮኬሚካሎች በኮርፖሬሽኑ መጋዘኖች እንደሚገኙ የጠቆሙት አቶ ሰለሞን፣ ተጠቃሚዎች ግብዓቶችን በመግዛት ምርትና ምርታማነታቸውን ማሳደግ እንደሚችሉ አስታውቀዋል፡፡

በቀጣይም ተጨማሪ ደረጃቸውን የጠበቁ የግብርና ምርት ማሳደጊያ ግብዓቶች በብዛት እንደሚቀርቡ አመልክተው፣ ከአንድ ቢሊዮን ብር በላይ ዋጋ ያላቸው የአግሮኬሚካሎች ግዥ በሂደት ላይ እንደሚገኝ ጠቁመዋል፡፡

በ2014 በጀት ዓመት በኮርፖሬሽኑ ቅርንጫፍ ጽ/ቤቶች ለተጠቃሚዎች ከቀረቡ የግብርና ምርት ማሳደጊያዎች ግብዓት ሽያጭ፣ ከአገልግሎት ክፍያ እና ከልዩ ልዩ ገቢዎች ከ3 ቢሊዮን 416 ሚሊዮን ብር በላይ ገቢ መገኘቱንም ሥራ አስፈጻሚው አክለው አስታውቀዋል፡፡                                                              ግብርናን ማዘመን ግባችን ነው!

የኢትዮጵያ የግብርና ሥራዎች ኮርፖሬሽን በ2014/15 የምርት ዘመን 14 ሺህ 141 ሄክታር መሬት በዘር በመሸፈን 361 ሺህ 156 ኩንታል ምርጥ ዘር ለማባዛት አቅዶ ወደ ሥራ ተገብቷል

ኮርፖሬሽኑ በሀገር ደረጃ ከ30 በመቶ በላይ የሚሆነውን የምርጥ ዘር ፍላጎት እያቀረበ እንደሚገኝ የገለጹት በኮርፖሬሽኑ የኢትዮጵያ የምርጥ ዘር አቅርቦት እና የደን ውጤቶች አቅርቦት ዘርፍ ሥራ አስፈጻሚ አቶ ዘነበ ወልደሥላሴ፣ በምርት ዘመኑ የተያዘውን ዕቅድ ለማሳካት የሚያስችሉ ሥራዎች በመከናወን ላይ መሆናቸውን አስታውቀዋል።

በአሁኑ ወቅት ኮርፖሬሽኑ  68 በመቶ የሚሆነውን ምርጥ ዘር በሰፋፊ የመንግሥት እና ባለሀብት እርሻዎች እና በአርሶ አደር ማሳ፣ ቀሪውን 32 በመቶ ደግሞ በራሱ የምርጥ ዘር ማባዣ እርሻ ልማት ጣቢያዎች በማባዛት ለተጠቃሚዎች እያቀረበ እንደሚገኝም ጠቁመዋል፡፡

በቀጣይ የምርጥ ዘር ጥራትና አቅርቦትን የበለጠ ለማሳደግ እንፈልጋለን ያሉት አቶ ዘነበ፣ “ለዚህም የራስ እርሻ መሬት ከፍተኛ ፋይዳ ስላለው የእርሻ መሬቶችን በማፈላለግ ተጨማሪ አዳዲስ የምርጥ ዘር ማባዣ እርሻ ልማት ጣቢያዎችን ለማቋቋም እየሰራን እንገኛለን” ብለዋል፡፡

ይህ በእንዲህ እንዳለ ኮርፖሬሽኑ በ2013/14 የምርት ዘመን ከ14 ሺህ ሄክታር መሬት በላይ በዘር በመሸፈን 281 ሺህ 852 ኩንታል ምርት መሰብሰብ የቻለ ሲሆን፣ ከዚህ ውስጥ 137 ሺህ 217 ኩንታል ዘር ለተጠቃሚዎች አቅርቧል።

በአሁኑ ወቅት ዘግይተው የሚዘሩ እንደ ጤፍ የመሳሰሉ ዘሮች ሽያጭ እየተከናወነ መሆኑን የገለጹት አቶ ዘነበ፣ ቀሪው ዘር ለመጠባበቂያ እንዲሆን መከማቸቱን ተናግረዋል፡፡

እንደ አቶ ዘነበ ገለጻ፣ ምርጥ ዘር የግብርና ምርትን ከ50 በመቶ በላይ የሚያሳድግ ዋነኛ ግብዓት በመሆኑ፤ ኮርፖሬሽኑ የ22 የሰብል ዓይነቶችን 69 ዝርያዎች በማባዛት እና በማዘጋጀት ለአርሶ አደሩ፣ ለከፊል አርሶ አደሩ፣ ለአርሶ አደር ማኅበራት፣ ለሰፋፊ እርሻዎች፣ ለክልል ግብርና ቢሮዎች፣ ለእርዳታ ድርጅቶች እንዲሁም ለሌሎች ዘር ተጠቃሚዎች እያቀረበ ይገኛል ብለዋል፡፡

ኮርፖሬሽኑ የዘር ብዜት ክፍተቶችን ለመሙላት በማሰብ ሌሎች ዘር አባዥዎች አዋጭ ባለመሆናቸው ምክንያት የማያባዟቸውን ቅድመ መስራች እና መስራች ዘሮችን በማባዛት እያቀረበ እንደሚገኝም አስታውቀዋል፡፡

በሌላ በኩል በሀገራችን አንዳንድ አካባቢዎች ከቅርብ ጊዜ ወዲህ በተፈጠረ የጸጥታ ችግር ምክንያት ምርጥ ዘር ማባዛት አለመቻሉን የጠቆሙት አቶ ዘነበ፣ ይህንን ለማካካስ ኮርፖሬሽኑ በደቡብ ምዕራብ ኢትዮጵያ ሕዝቦች ክልል ካፋ ዞን ታማሻሎ በሚባል አካባቢ የተረከበውን የምርጥ ዘር ማባዣ እርሻ መሬት ወደ ሥራ በማስገባት ምርጥ ዘር ማባዛት መጀመሩን ተናግረዋል፡፡

” እንደ ተቋም በሀገር ደረጃ ከ30 በመቶ በላይ የሚሆነውን የምርጥ ዘር ፍላጎት እያቀረብን እንገኛለን” ያሉት አቶ ዘነበ፣ ኮርፖሬሽኑ  68 በመቶ የሚሆነውን ዘር በሰፋፊ የመንግሥት እና ባለሀብት እርሻዎች እና በአርሶ አደር ማሳ ላይ፣ ቀሪውን 32 በመቶ ደግሞ በራሱ የምርጥ ዘር ማባዣ እርሻ ልማት ጣቢያዎች በማባዛት እያቀረበ እንደሚገኝ አብራርተዋል፡፡

የኢትዮጵያ የግብርና ሥራዎች ኮርፖሬሽን ከሚያከናውናቸው በርካታ የግብርና ልማት ሥራዎች ውስጥ አንዱ የተለያዩ የአዝርዕት፣ አትክልት እና ፍራፍሬ ምርጥ ዘር ማባዛት፣ ማዘጋጀት እና ማሰራጨት ነው፡፡

በኮርፖሬሽኑ ስር የሚገኘው የኢትዮጵያ የምርጥ ዘር አቅርቦት እና የደን ውጤቶች አቅርቦት ዘርፍ ከ40 ዓመታት በላይ ምርጥ ዘር የማባዛት፣ የማዘጋጀት እና የማሰራጨት ልምድ አለው፡፡

ኮርፖሬሽኑ 181 ትራክተሮችን ከነመለዋወጫቸው እና ተቀጥላቸው ሊያቀርብ ነው

   

        * በተጠናቀቀው በጀት ዓመት 46 የአውሮፓ ስሪት ትራክተሮችን ለተጠቃሚዎች አቅርቧል

የኢትዮጵያ የግብርና ሥራዎች ኮርፖሬሽን በ2015 በጀት ዓመት 181 ትራክተሮችን ከነመለዋወጫቸው እና ተቀጥላቸው ከውጭ ገበያ በማስመጣት ለተጠቃሚዎች ሊያቀርብ ነው፡፡

በኮርፖሬሽኑ የእርሻ መሣሪያዎች እና ሜካናይዜሽን አገልግሎት ዘርፍ ሥራ አስፈጻሚ አቶ መንግስቱ ክፍሌ እንደገለጹት፣ ለአማራ ክልል 75 እንዲሁም ለአርሶ አደሮች እና በሰፋፊ እርሻ ለተሰማሩ ባለሃብቶች 106 በድምሩ 181 ዘመናዊ እና አስተማማኝ ትራክተሮችን ለማቅረብ ዝግጅት ተጀምሯል፡፡

የእርሻ መሣሪያዎች የግብርናን ሥራ በማዘመን ምርትና ምርትማነትን በከፍተኛ ደረጃ ይጨምራሉ ያሉት አቶ መንግስቱ፣ ኮርፖሬሽኑ በ2014 በጀት ዓመት በ179 ሚሊዮን ብር ወጪ ከ110 እስከ 180 የፈረስ ጉልበት ያላቸው 46 ትራክተሮችን ከነተቀጥላቸው ከጣሊያን ሀገር በማስመጣት ለተጠቃሚዎች ማቅረቡንም ተናግረዋል፡፡

በአጠቃላይ በተጠናቀቀው በጀት ዓመት ከ221 ሚሊዮን ብር በላይ ዋጋ ያላቸው የእርሻ መሣሪያዎች፣ ተቀጥላዎች (ማረሻ፣ መከስከሻ፣ መስመር ማውጫ፣ ዘር መዝሪያ) እና የትራክተር ጋሪዎች ለተጠቃሚዎች መቅረባቸውን ነው ሥራ አስፈጻሚው የገለጹት፡፡

በተጨማሪም 108 ሚሊዮን ብር የሚጠጋ ዋጋ ያላቸው የእርሻ መሣሪያዎች፣ የኮንስትራክሽን ማሽነሪዎች እና የከባድ ተሽከርካሪዎች ጎማ፣ ባትሪ፣ ፊልተር እና ሌሎች መለዋወጫዎችንም አቅርበናል ብለዋል፡፡

በሌላ በኩል በግብርና ሜካናይዜሽን አገልግሎት የመሬት እና የማሳ ዝግጅት እንዲሁም የምርት መሰብሰብ ሥራዎች ለተጠቃሚዎች ተደራሽ መደረጋቸውን አቶ መንግስቱ አስታውቀዋል፡፡

ከምርት መሰብሰብና ማጓጓዝ አኳያም ሲገልጹ፣ “በዋናነት ለአርሶ አደሮች 192 ሺህ ኩንታል ምርት አጭደን፣ ወቅተን እና አጓጉዘን እስከ ማከማቻ በማድረስ የምርት ብክነት እንዲቀንስ፣ የአርሶ አደሩ ምርታማነት እንዲጨምር እንዲሁም ጊዜውና ጉልበቱ እንዲቆጠብ አድርገናል” ብለዋል፡፡    

በመሬት ዝግጅት ረገድም በኦሞ ኩራዝና ጣና በለስ የስኳር ልማት ፕሮጀክቶች ለሸንኮራ አገዳ ልማት እና ለኮርፖሬሽኑ የምርጥ ዘር ማባዣ የሚውል 1 ሺህ 200 ሄክታር መሬት ለእርሻ ምቹ ተደርጎ በኮርፖሬሽኑ መዘጋጀቱንም ተናግረዋል፡፡

በማሣ ዝግጅትም 5 ሺህ 862 ሄክታር መሬት በማረስ፣ በመከስከስ እና ዘር በመዝራት ለተጠቃሚዎች አገልግሎት መሰጠቱን ገልጸዋል፡፡

በ2015 በጀት ዓመት በ15 የምርት መሰብሰቢያ ኮምባይነሮች እና በ10 የደረቅ ጭነት ማጓጓዣ ተሽከርካሪዎች በመታገዝ የተሻለ የሜካናይዜሽን አገልግሎት ለመስጠት በዝግጅት ላይ እንደሚገኙ የተናገሩት አቶ መንግስቱ፣ ስለ ትራክተር አያያዝ እና አጠቃቀም በስፋት ሥልጠና ለመስጠት መዘጋጀታቸውንም አያይዘው ጠቁመዋል፡፡

                                                                      ግብርናን ማዘመን ግባችን ነው!

ኮርፖሬሽኑ 46 ትራክተሮችን ለተጠቃሚዎች አስረከበ

የኢትዮጵያ የግብርና ሥራዎች ኮርፖሬሽን (ኢግሥኮ) ከ151 ሚሊዮን ብር በላይ በሆነ ወጪ 46 ዱዝ-ፋር (DEUTZ-FAHR) ትራክተሮችንከጣሊያንሀገርበማስመጣትለተጠቃሚዎችበሽያጭ አስረክቧል፡፡ ከ110 እስከ 180 የፈረስ ጉልበት ያላቸው እነዚህ ትራክተሮች በሽያጭ የቀረቡት ለአማራ ክልል ግብርና ቢሮ፣ ለሲዳማ ክልል እርሻ እና የተፈጥሮ ሃብት ቢሮ እንዲሁም ለእንጅባራ፣ ደብረ ብርሃን እና ጎንደር ዩኒቨርሲቲዎች፤ ለአጋርፋ ግብርና ኮሌጅ እና በእርሻ ሥራ ላይ ለተሰማሩ ባለሃብቶች ነው፡፡ ትራክተሮቹ የ2021 እና 2022 ምርት በመሆናቸው ዘመኑ የደረሰበትን ቴክኖሎጂ ከማሟላታቸው ባሻገር ለሀገራችን የአየር ንብረትና የመሬት አቀማመጥ ተስማሚ ስለመሆናቸው ተጠቃሚዎች ይመሰክራሉ፡፡ ከዚህ አኳያ ትራክተሮቹ በሀገራችን ሜካናይዝድ እርሻን ለማስፋፋት፣ ምርትና ምርታማነትን ለማሳደግ እና የግብርናውን ዘርፍ ለማዘመን ከፍተኛ ፋይዳ እንደሚኖራቸው ይታመናል፡፡ ይህ በእንዲህ እንዳለ ኮርፖሬሽኑ የተጨማሪ 12 ዱዝ-ፋር ትራክተሮች ግዥ የፈጸመ ሲሆን፣ ከሚቀጥለው ሳምንት ጀምሮ ሀገር ውስጥ ይደርሳሉ ተብሎ ይጠበቃል፡፡ በቀጣይም የአመራረት ዘዴን በቴክኖሎጂ የተደገፈ ለማድረግ ዘመናዊ፣ አስተማማኝና ጥራት ያላቸውን የእርሻ መሣሪያዎች እስከ መለዋወጫቸው ከውጭ ሀገር በማስመጣት ለተጠቃሚዎች በተመጣጣኝ ዋጋ ለማቅረብ ቅድመ ዝግጅት እየተደረገ ነው፡፡ በሌላ በኩል ኮርፖሬሽኑ ለሚያቀርባቸው ትራክተሮች ከሽያጭ በኋላ የጥገና፣ የቴክኒክ ሞያ ሥልጠና እንዲሁም መለዋወጫዎችን የማቅረብ አገልግሎቶችን ይሰጣል፡፡ እንዲሁም ከግብርና ማሳደጊያዎች ግብዓት እና መሣሪያዎች አቅርቦት በተጨማሪ ከመሬት ዝግጅት እስከ ጎተራ የሚዘልቅ የተቀናጀ የግብርና ሜካናይዜሽን አገልግሎት ተደራሽ እያደረገ ይገኛል፡፡ በተጨማሪ የእርሻና የኮንስትራክሽን መሣሪያዎች ኪራይ፣ የደረቅ ጭነት ትራንስፖርት፣ የተሽከርካሪዎች ጥገና፣ የዘር ብጠራ እና የማማከር ሥራ በኮርፖሬሽኑ የሚሰጡ ሌሎች አገልግሎቶች ናቸው፡፡ በአምስት ትላልቅ የልማት ደርጅቶች ውህደት በሚኒስትሮች ምክር ቤት ደንብ ቁጥር 368/2008 መሠረት ታህሳስ 2008 ዓ.ም የተቋቋመው የኢትዮጵያ የግብርና ሥራዎች ኮርፖሬሽን (ኢግሥኮ) ለግብርና ምርትና ምርታማነት እድገት እና ለዘርፉ መዘመን የላቀ አስተዋጽዖ ያላቸውን ምርጥ ዘር፣ የአፈር ማዳበሪያ፣ አግሮኬሚካልና የኬሚካል መርጫ መሣሪያዎችን እንዲሁም የእርሻ መሣሪያዎችን ከነመለዋወጫቸው ለተጠቃሚዎች በተመጣጣኝ ዋጋ በማቅረብ ላይ ይገኛል።

ግብርናን ማዘመን ግባችን ነው!

“ለኮርፖሬሽኑ ምርጥ ዘር ለሚያባዙ ባለሃብቶች የምናደርገውን ድጋፍ አጠናክረን እንቀጥላለን” የኢግሥኮ ዋና ሥራ አስፈጻሚ

ከኢትዮጵያ የግብርና ሥራዎች ኮርፖሬሽን (ኢግሥኮ) ጋር ውል ገብተው ምርጥ ዘር እያባዙ ለሚገኙ ባለሃብቶች ኮርፖሬሽኑ የሚያደርገውን ድጋፍ አጠናክሮ እንደሚቀጥል የተቋሙ ዋና ሥራ አስፈጻሚ ገለጹ፡፡ ዋና ሥራ አስፈጻሚው አቶ ክፍሌ ወልደማርያም ይህን የገለጹት፣ በምስራቅ ባሌ ዞን  በኮንትራት እርሻ ለኮርፖሬሽኑ የምርጥ ዘር እያባዙ ከሚገኙ ባለሃብቶችና የባለድርሻ አካላት ጋር  በቢሾፍቱ ያቱ ሆቴል ግንቦት 28/2014 ዓ.ም. በተካሄደ የምክክር መድረክ ላይ ነው፡፡ “እናንተ ዘር የምታባዙት ለእኛ በመሆኑ ከራሳችን እርሻ ለይተን አናያችሁም” ያሉት አቶ ክፍሌ፣ ለዚህም አስፈላጊውን ድጋፍ ሁሉ ለማድረግ እና በትብብር ለመስራት ቁርጠኛ ነን ብለዋል፡፡ ባለሃብቶቹ በበኩላቸው ምርጥ ዘር የማባዛት ሥራን ከኮርፖሬሽኑ ጋር በትብብር እየሰሩና በተቋሙም ድጋፍ እየተደረገላቸው ስለመሆኑ አስታውሰው፣ በቀጣይም ድጋፉ ተጠናክሮ እንደሚቀጥል ያላቸውን እምነት ገልጸዋል፡፡ አክለውም በአፈር ማዳበሪያ፣ በመስራች ዘር እና አግሮኬሚካሎች አቅርቦት ላይ ያጋጠሙ ችግሮች እንዲስተካከሉ እንዲሁም የሰብል ዝርያዎች ምርታማነት እየቀነሰ ከመሆኑ ጋር ተያይዞ ከፍተኛ ምርት የሚሰጡ አዳዲስ የተሻሻሉ የሰብል ምርጥ ዘሮች እንዲቀርብላቸው ጠይቀዋል፡፡

 የኮርፖሬሽኑ ዋና ሥራ አስፈጻሚ ከባለሃብቶች ለተነሱ ጥያቄዎች በሰጡት ምላሽ፣ የተጠየቁ የግብርና ግብዓቶችን በቀጣይ ጊዜያት እንደሚያቀርቡ ተናግረዋል። በኮርፖሬሽኑ የኦፕሬሽን ዐቢይ ዘርፍ ምክትል ዋና ሥራ አስፈጻሚ አቶ ፈለቀ ገዛኸኝ በመድረኩ ባቀረቡት ገለጻ፣ ኮርፖሬሽኑ በሀገር አቀፍ ደረጃ ከ25 እስከ 30 በመቶ የሚሆነውን የምርጥ ዘር አቅርቦት እየሸፈነ እንደሚገኝ ጠቁመው፣ ከዚህ ውስጥ ኮርፖሬሽኑ አብዛኛውን ዘር በሰፋፊ የመንግሥት እና ባለሃብቶች እርሻዎች እንዲሁም በአርሶ አደር ማሳ ላይ በትብብር በማምረት ለተጠቃሚዎች እንደሚያቀርብ አስታውቀዋል፡፡ ከዚህ አኳያ በዘንድሮ የሰብል ዘመን ኮርፖሬሽኑ ከ36 ሚሊዮን ብር በላይ ዋጋ ያለው ምርጥ ዘር በብድር ለባለሃብቶች መስጠቱን እንዲሁም የሞያና ሌሎች ድጋፎችን ማድረጉን በኮርፖሬሽኑ የኢትዮጵያ ምርጥ ዘርና ደን ውጤቶች አቅርቦት ዘርፍ ሥራ አስፈጻሚ አቶ ዘነበ ወልደሥላሴ ተናግረዋል። የኮፈሌ ቅ/ጽ/ቤት ሓላፊ አቶ ቡሽራ መሐመድ በበኩላቸው፣ ቅርንጫፉ ከምርጥ ዘር አባዥ ባለሃብቶች ጋር በመተባበር በመጪው የመኸር ወቅት 5 ሺህ ሄክታር የሚጠጋ መሬት በዘር በመሸፈን ከ131 ሺህ ኩንታል በላይ ምርጥ ዘር ለማምረት አቅዶ አየሰራ መሆኑን ገልጸዋል፡፡ ኮርፖሬሽኑ በኮንትራት እርሻ በተለያዩ አካባቢዎች በባለሃብቶች መሬት ከሚያባዛው ምርጥ ዘር ውስጥ  በምስራቅ ባሌ ዞን የሚያባዛው ከፍተኛ ድርሻ እንዳለው አቶ ቡሽራ ጠቁመዋል፡፡ በውይይት መድረኩ ላይ የተገኙት የምስራቅ ባሌ ዞን ምክትል ዋና አስተዳዳሪ አቶ መሐመድ እስማኤል ባስተላለፉት መልእክት፣ ኮርፖሬሽኑ በዞኑ ለሚያደርገው የግብርና ልማት በጋራ ከማቀድ ጀምሮ ተገቢውን ድጋፍ እንደሚያደርጉ አስታውቀው፣ በዞኑ ያለውን የመስኖ ልማት በመጠቀም ለቆላማ አካባቢዎች ተስማሚ የሆኑ ምርጥ ዘር የማባዛት ሥራ ላይ ትኩረት ማድረግ እንደሚገባ አቅጣጫ አመላክተዋል። በመድረኩ ስለ ምርጥ ዘር አመራረት፣ አዘገጃጀትና ሥርጭት፤ የዘር ጥራት ቁጥጥር፣ መርሆዎችና ሂደት እንዲሁም የሀገሪቱ የምርጥ ዘር ፖሊሲ፣ ህግና ደንብን አስመልከቶ በባለሞያዎች የግንዛቤ ማስጨበጫ ሥልጠና ተሰጥቷል፡፡ የኮፈሌ ቅርንጫፍ ጽህፈት ቤት ባዘጋጀው በዚህ የግማሽ ቀን የውይይት መድረክ ላይ የኮርፖሬሽኑ አመራሮችና ባለሞያዎች፤ የምስራቅ ባሌ ዞን ምክትል ዋና አስተዳዳሪ፣ የዞኑ የግብርና እና ኢንቨስትመንት ጽ/ቤት ሓላፊዎች፤ በምርጥ ዘር ብዜት የተሰማሩ ድርጅቶች እና ማህበራት እንዲሁም የአርዳይታ እና አጋርፋ የግብርና ቴክኒክና ሞያ ማሠልጠኛ ኮሌጆች ተገኝተዋል፡፡ በመድረኩ ማጠቃለያም በ2013/14 የምርት ዘመን ከኮርፖሬሽኑ ጋር በመተባበር በምስራቅ ባሌ ዞን በኮንትራት እርሻ በምርጥ ዘር ብዜት የላቀ አስተዋጽዖ ላበረከቱ የዘር አባዦችና የባለድርሻ አካላት የምስጋናና የእውቅና የምስክር ወረቀት ተሰጥቶአቸዋል። የኢትዮጵያ የግብርና ሥራዎች ኮርፖሬሽን በራሱ እርሻዎች፣ በሰፋፊ የመንግሥት እና ባለሃብት እርሻዎች እንዲሁም በአርሶ አደር ማሳ ላይ ምርጥ ዘርን በጥራት እና በብዛት በማባዛት ለተጠቃሚዎች እያሰራጨ የሚገኝ የመንግሥት የልማት ድርጅት ነው፡፡

ግብርናን ማዘመን ግባችን ነው!

የደን ውጤት ምርቶችን ወደ ውጭ በመላክ ከ900 ሺህ ዶላር በላይ ገቢ ተገኝቷል

ነሐሴ 4/2013 (ኢዜአ) የደን ውጤት የሆኑ ምርቶችን ወደ ውጭ በመላክ ከ900 ሺህ ዶላር በላይ መገኘቱን የኢትዮጵያ የግብርና ሥራዎች ኮርፖሬሽን ገለፀ።

የኮርፖሬሽኑ ዋና ስራ አስፈፃሚ አቶ ክፍሌ ወልደማርያም የተቋሙን የ2013 በጀት ዓመት ስራ አፈፃፀም አስመልክተው መግለጫ ሰጥተዋል።

በመግለጫቸው የምርጥ ዘር፣ የደን ውጤቶችና የግብርና ምርት ማሳደጊያ አቅርቦቶችን ጨምሮ የእርሻ መሳሪያዎች አቅርቦትና የሜካናይዜሽን አገልግሎትን ከማስፋት አኳያ የተሰሩ ስራዎችን አብራርተዋል።

የደን ውጤቶች የሆኑትን እንደ ሙጫ፣ እጣን፣ ከርቤ እና አበክድ ምርቶችን ወደ ውጭ በመላክ በበጀት ዓመቱ ከ900 ሺህ በላይ ዶላር ገቢ መገኘቱን ጠቅሰዋል።

ገቢው የተገኘው የደን ውጤቶችን ለማምረት በማኅበር ከተደራጁ ወጣቶች ከተሰባሰበው ከሁለት ሺህ ኩንታል በላይ ምርት እንደሆነም ገልጸዋል።

ዋና ስራ አስፈጻሚው በበጀት ዓመቱ ከ13 ሺህ ሄክታር በሚልቅ መሬት ከ284 ሺህ ኩንታል በላይ ምርጥ ዘር ማምረት እንደተቻለ ገልጸዋል።

በበጀት ዓመቱ ከ172 ሺህ 395 ኩንታል ምርጥ ዘር ከ617 ሚሊዮን ብር በላይ ሽያጭ መከናወኑን አክለዋል።

በሌላ በኩል በግብርና ምርት ማሳደጊያ አቅርቦት ከ600 ሚሊዮን ዶላር በላይ ወጪ ከውጭ አገር የአፈር ማዳበሪያ፣ ፀረ አረም እና ተባይ ኬሚካሎች ተገዝተው ለተጠቃሚዎች መሰራጨታቸውን ተናግረዋል።

የዓለም ገበያ የማዳበሪያ ዋጋ ጭማሪ አርሶ አደሩን እንዳይጫን ኮርፕሬሽኑ ከ60 ሚሊዮን ብር በላይ ኪሳራ በመውሰድና መንግሥት በበኩሉ ከ4 ነጥብ 5 ቢሊዮን ብር በላይ የትራንስፖርት ወጪ በመሸፈን ተሰራጭቷል ብለዋል።

የእርሻ መሳሪያዎች አቅርቦትና  የሜካናይዜሽን አገልግሎትን ከማስፋት አንፃርም ከ73 ሚሊዮን ብር በላይ ዋጋ ያላቸው የእርሻ መሳሪያዎችና መለዋወጫዎች ለተጠቃሚዎች ቀርበዋል ብለዋል።

አቶ ክፍሌ አያይዘውም በ2014 በጀት ዓመት ምርጥ ዘር የማባዛትና የማሰራጨት ስራ በትኩረት እንደሚከናወን ጠቁመዋል።

በአገሪቷ ሁሉም አከባቢዎች የሚገኙ የኮርፖሬሽኑ መሬቶች ፆም እንዳያድሩ እየተሰራ መሆኑንም አክለዋል። 

የግብርና ግብዓቶች አቅርቦትን ለማሳደግና ተደራሽ ለማድረግ፣ የተቀናጀ የሜካናይዜሽን አገልግሎት ለማስፋትና ከክልሎች የተገኙ የእርሻ መሬቶችን ለማልማት እንቅስቃሴ መጀመሩንም ነው የተናገሩት። የኢትዮጵያ ግብርና ሥራዎች ኮርፖሬሽን የግብርና ምርትና ምርታማነትን የሚያሳድጉ ቴክኖሎጂዎችን ለአርሶና አርብቶ አደሩ ተደራሽ በማድረግ የአገሪቷን የምጣኔ ሀብት እድገት የማገዝ ዓላማ አንግቦ የሚሰራ ተቋም ነው