ከመሬት ዝግጅት እስከ ጎተራ

የአርሶና አርብቶ አደሩ አለኝታ የሆነው የኢትዮጵያ የግብርና ሥራዎች ኮርፖሬሽን ግብርናን በማዘመን የምግብ ሉዓላዊነትን ለማረጋገጥ የሚያስችለውን የአንድ መስኮት የተቀናጀ አገልግሎት በጊዜ፣ በጥራትና በተመጣጣኝ ዋጋ በመስጠት ላይ ይገኛል።

በዚህ ረገድ በተቀናጀ የግብርና ሜካናይዜሽን አገልግሎት ከመሬት ዝግጅት እስከ ጎተራ የሚዘልቁ የግብርና ሥራዎችን በማከናወን ላይ ነው፡፡

በተጨማሪም ለግብርና መዘመንና ለምርታማነት እድገት የላቀ አስተዋጽዖ ያላቸውን የግብርና ግብዓቶች:-

– ምርጥ ዘር፣

– ጠጣርና ፈሳሽ ማዳበሪያዎች፣

– አግሮኬሚካሎች፣

– የእንስሳት መድኃኒት እንዲሁም የእርሻ መሣሪያዎችን ከእነተቀጽላቸውና መለዋወጫቸው ለተጠቃሚዎች ያቀርባል፡፡

ኮርፖሬሽኑ ለደንበኞቹ እየሰጠ የሚገኘውን የአንድ መስኮት አገልግሎት የተሟላ ለማድረግ ከእርሻ መሣሪያዎች ሽያጭ በኋላ የቴክኒክና ሞያ ሥልጠና፣ የጥገናና የምክር አገልግሎቶችን ይሰጣል።

የዘር ብጠራና የደረቅ ጭነት ትራንስፖርት አገልግሎቶችንም ተደራሽ በማድረግ ላይ ይገኛል።

ስለሆነም ክቡራን ደንበኞቻችን፥ ሁሉ ሙሉ፣ ሁሌም ዝግጁ ወደ ሆነው ኮርፖሬሽናችን ጎራ ሲሉ እንደምንጊዜውም ተደስተው ይመለሳሉ።

                 ###

ግብርናን ማዘመን ግባችን ነው!

የሥራ አመራር ቦርድ የኮርፖሬሽኑን አፈጻጸም ገመገመ

አዲስ አበባ፣ ግንቦት 10 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን የሥራ አመራር ቦርድ የኮርፖሬሽኑን የ2018 በጀት ዓመት የ10 ወራት ዕቅድ አፈጻጸም ገመገመ።

ቦርዱ ግንቦት 10 ቀን 2018 ዓ.ም በኮርፖሬሽኑ ዋና መ/ቤት ባደረገው ግምገማ ተቋሙ አበረታች ውጤት እያስመዘገበ መምጣቱን ገልጾ፣ ቀጣይ የሥራ አቅጣጫ ሰጥቷል።
###
ግብርናን ማዘመን ግባችን ነው!

ለለውጥ ሥራዎች አጋዥ የሆነ ሥልጠናና የመስክ ጉብኝት ተደረገ

ሀዋሳ፣ ግንቦት 2 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን የጀመራቸውን የለውጥ ሥራዎች ለማስቀጠል አጋዥ የሆነ ሥልጠናና የመስክ ጉብኝት ግንቦት 2 ቀን 2018 ዓ.ም ተደረገ።

የኮርፖሬሽኑ የሥራ ኃላፊዎች የተገኙበት የመስክ ጉብኝት የተካሄደው በሀዋሳ ከተማ ዙሪያ በሚገኝ “የመርሲ የቤተሰብ ዲያሪ ፋርም” ነው።

ይህ በእንዲህ እንዳለ የዲያሪ ፋርሙ ባለቤት ኢያሱ ነጆ (ዶ/ር)፣ ለኮርፖሬሽኑ የሥራ ኃላፊዎች “Transformational leader ship” በሚል ርዕስ በንድፈ ሀሳብና በተግባር የተደገፈ የማነቃቂያ ሥልጠና /Motivational training/ ሰጥተዋል።

በመጨረሻም ለለውጥ ተሞክሮ ታስበው በተዘጋጁት ሥልጠናና ጉብኝት ዙሪያ ውይይት ተደርጓል።
                ###
ግብርናን ማዘመን ግባችን ነው!

የኮርፖሬሽኑ የ10 ወራት ዕቅድ አፈጻጸም ተገመገመ

ሀዋሳ፣ ግንቦት 2 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን የ2018 በጀት ዓመት የ10 ወራት ዕቅድ አፈጻጸም ግንቦት 2 ቀን 2018 ዓ.ም ተገመገመ።

የኮርፖሬሽኑ ሥራ አመራር፣ የቅርንጫፍና ጣቢያ ሥራ አስኪያጆች እንዲሁም የሠራተኛ ማኅበር ሊቀመንበር በተገኙበት የተገመገመው አፈጻጸም ከገቢና ትርፍ አኳያ ከዕቅድ በላይ መሆኑ ተገልጿል።

ለውጤቱ መገኘት ባለፉት ጊዜያት የተከናወኑ የለውጥ ሥራዎች ተጠቃሽ መሆናቸውን የቀረበው የዕቅድ አፈጻጸም ሪፖርት ያመለክታል።

የግምገማ መድረኩን የመሩት የኮርፖሬሽኑ ዋና ሥራ አስፈጻሚ  ወይዘሮ የሺእመቤት ነጋሽ ለውጤቱ መገኘት የኮርፖሬሽኑን የሥራ መሪዎችና ሠራተኞች አመስግነው፣ በዕቅድ የተያዙ ቀሪ ሥራዎችን በሁለት ወራት ጊዜ ውስጥ ለማሳካት ርብርብ እንዲደረግ አሳስበዋል።

አክለውም የኮርፖሬሽኑን ዓላማና ግብ ለማሳካት የተጀመሩ የለውጥ ሥራዎች ተጠናክረው እንዲቀጥሉ መልእክት አስተላልፈዋል።
               ###
ግብርናን ማዘመን ግባችን ነው!

ኮርፖሬሽኑ አነስተኛ የእርሻ መሬት ላላቸው አርሶ አደሮች ትራክተሮችን አቀረበ

አዲስ አበባ፣ ሚያዝያ 28 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን አነስተኛ የእርሻ መሬት ላላቸው አርሶ አደሮችና ባለሃብቶች የቼክ ሪፐብሊክ ምርት የሆኑ 24 ትራክተሮችን አቀረበ፡፡

‘ዜቶር’ ተብለው የሚታወቁት እነዚህ ትራክተሮች 95 የፈረስ ጉልበት ያላቸው ሲሆን፣ በኮርፖሬሽኑ የኢንጂነሪንግና መገጣጠሚያ የሥራ ክፍል በራስ አቅም ተገጣጥመው ለገበያ ቀርበዋል፡፡

ትራክተሮቹ ሙሉ መለዋወጫና ተቀጽላ መሣሪያዎች ያሏቸው መሆኑን የኮርፖሬሽኑ የእርሻ መሣሪያዎች አቅርቦት ዘርፍ ተወካይ ወ/ሮ ናፈቁሽ ደሴ ገልጸዋል።

ኮርፖሬሽኑ ከ’ዜቶር’ አምራች ኩባንያ ጋር በመተባበር ከሽያጭ በኋላ ለደንበኞች የቴክኒክና ሞያ ሥልጠናና የምክር አገልግሎት እየሰጠ እንደሚገኝም አብራርተዋል፡፡

በተመሳሳይ ኮርፖሬሽኑ ስንዴ፣ በቆሎ፣ አኩሪ አተርና ሱፍ አጭደው የሚሰበስቡ ‘ዙምላየን’ በመባል የሚታወቁ 190 የፈረስ ጉልበት ያላቸው ቻይና ሠራሽ አጭዶ መውቂያዎችን (Combine harvester) በድጋሚ ለደንበኞቹ ማቅረቡን አስታውቀዋል።

ከዚህ ባሻገር የተለያዩ የፈረስ ጉልበት ያላቸው የጣልያን ስሪት ትራክተሮች፣ ቆሞ መውቂያዎች፣ መከስከሻዎች፣ ማረሻዎች፣ መስመር ማውጫዎች፣ የኬሚካል መርጫ መሣሪያዎች፣ ጎማዎች፣ ፊልትሮዎች፣ የመዳብ ሽቦዎችና የውኃ ፓምፖች በክምችት ይገኛሉ ብለዋል።
###
ግብርናን ማዘመን ግባችን ነው!

የገበያ ትስስር ለመፍጠር የሚያስችል ውይይት ተካሄደ

አዲስ አበባ፣ ሚያዝያ 24 ቀን 2018 ዓ.ም (ኢግሥኮ)፦ በግብርና ግብዓት፣ በእርሻ መሣሪያዎችና በግብርና ሜካናይዜሽን አገልግሎት የገበያ ትስስር ለመፍጠር የሚያስችል ውይይት ሚያዝያ 24 ቀን 2018 ዓ.ም ተካሄደ።

የኢትዮጵያ የግብርና ሥራዎች ኮርፖሬሽን ከግሪን አግሮ ሶሉሽን ኃላፊነቱ የተወሰነ የግል ኩባንያ – ‘ለእርሻ’ ጋር በመተባበር ባዘጋጀው የገበያ ትስስር መድረክ ላይ የባለድርሻ አካላት ተወያይተዋል።

የውይይቱ ተሳታፊዎች በጋራ በመሥራት አነስተኛ የእርሻ መሬት ያላቸውን አርሶ አደሮች ምርታማ ማድረግ በሚቻልበት አማራጭ ዙሪያ መክረዋል፡፡

በውይይቱ ላይ የኮርፖሬሽኑ ዋና ሥራ አስፈጻሚ ተወካይ አቶ ደሳለኝ በላቸው እንደተናገሩት፣ መድረኩ የባለድርሻ አካላትን በማጣመር፣ የገበያ ትስስር በመፍጠር፣ ግብርናን በማዘመንና ምርታማነትን በማሳደግ የምግብ ሉዓላዊነትን ለማረጋገጥ ያግዛል ብለዋል።

የ’ለእርሻ’ ዋና ሥራ አስፈጻሚ አቶ አብርሃም እንድርያስ በበኩላቸው፣ ተቋማቸው በግብርናው መስክ ሰፊ አቅምና ልምድ ካለው ከኢትዮጵያ የግብርና ሥራዎች ኮርፖሬሽን ጋር በመሥራቱ አነስተኛ ማሳ ያላቸውን አርሶ አደሮች ተጠቃሚ ለማድረግ እንደሚያስችለው አስታውቀዋል፡፡

በተመሳሳይ በውይይቱ ላይ የተገኙት የኢትዮጵያ ንግድ ባንክ፣ የንብ ኢንተርናሽናል፣ የዳሸን እና የኦሮሚያ ኅብረት ሥራ ባንኮች ተወካዮች ለአርሶ አደሮች የተለያዩ የብድር አማራጮችን እያቀረቡ እንደሚገኙ አስታውቀው፣ የጀመሩትን ጥረት አጠናክረው እንደሚቀጥሉ አረጋግጠዋል፡፡

በሌላ በኩል በውይይቱ ላይ የተሳተፉ አርሶ አደሮች ከመድረኩ ከፍተኛ ግንዛቤ ማግኘታቸውን የገለጹ ሲሆን፣ የግብርና ግብዓት አቅራቢዎችና የሜካናይዜሽን አገልግሎት ሰጪዎች በበኩላቸው ከኮርፖሬሽኑ እና ከ’ለእርሻ’ ጋር ተባብረው ለመሥራት ዝግጁ መሆናቸውን አስታውቀዋል።

ከውይይት መድረኩ አስቀድሞ ተሳታፊዎች በኮርፖሬሽኑ የሚገኙ የእርሻ መሣሪያዎችን እና ወርክ ሾፕ ጎብኝተዋል።

በግሪን አግሮ ሶሉሽን ኃላፊነቱ የተወሰነ የግል ኩባንያ የተቋቋመ የዲጂታል መድረክ (Platform) የሆነው ‘ለእርሻ’፣ ዘመናዊ የመገናኛ ቴክኖሎጂዎችን በመጠቀም አነስተኛ አርሶ አደሮችን ከግብርና ግብዓት አቅራቢዎች፣ ከግብርና ሜካናይዜሽን አገልግሎት ሰጪዎች፣ ከፋይናንስ ተቋማትና ከገበያ ጋር ከማስተሳሰር ባሻገር በአየር ንብረት ዙሪያ የምክር አገልግሎት ይሰጣል፡፡

የኢትዮጵያ የግብርና ሥራዎች ኮርፖሬሽን እና ‘ለእርሻ’ አነስተኛ ማሳ ያላቸውን አርሶ አደሮች ተጠቃሚ የሚያደርግ የመግባቢያ ስምምነት (MoU) መጋቢት 8 ቀን 2018 ዓ.ም መፈራረማቸው ይታወሳል፡፡
###
ግብርናን ማዘመን ግባችን ነው!

የኮርፖሬሽኑ ከፍተኛ አመራሮች በሞጆ ደረቅ ወደብ የአፈር ማዳበሪያ ሥርጭትን ተመለከቱ

አዲስ አበባ፣ ሚያዝያ 9 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን ከፍተኛ አመራሮች በሞጆ ደረቅ ወደብ በመገኘት የአፈር ማዳበሪያ ሥርጭት ሂደትን ተመልክተዋል።

በኮርፖሬሽኑ ዋና ሥራ አስፈጻሚ ወይዘሮ የሺእመቤት ነጋሽ የተመራው የተቋሙ የበላይ አመራር ከጂቡቲ ወደብ በባቡር ተጓጉዞ ሞጆ ደረቅ ወደብ የደረሰ ማዳበሪያና ከወደቡ በኢትዮጵያ ባሕር ትራንስፖርትና ሎጂስቲክስ ተሽከርካሪዎች አማካኝነት ወደ አርሶ አደሮች የኅብረት ሥራ ማኅበራት የሚደረገውን ሥርጭት ቃኝቷል።

በዚሁ ወቅት የሞጆ ደረቅ ወደብ የሥራ ኃላፊዎች ስለ ኦፕሬሽኑ አጠቃላይ ሂደት ገለጻ አድርገዋል።

የኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ፣ የአፈር ማዳበሪያን ለአርሶ አደሩ በወቅቱ ለማድረስ የባቡር ፉርጎዎችንና የከባድ ጭነት ተሽከርካሪዎችን በማቀናጀት ሥርጭቱን ይበልጥ ለማቀላጠፍ እየተሠራ መሆኑን አስታውቀዋል።

የግብርና ሚኒስቴር በየዓመቱ እያጠና በሚያቀርበው የሀገሪቱ የአፈር ማዳበሪያ ፍላጎት መሰረት የኢትዮጵያ የግብርና ሥራዎች ኮርፖሬሽን ከተቋቋመበት ከ2008 ዓ.ም ጀምሮ የማዳበሪያ ግዥ በመፈጸም ላይ ይገኛል።
                 ###
ግብርናን ማዘመን ግባችን ነው!

EABC Holds Talks with Belarusian Delegation on Agricultural Cooperation

Addis Ababa, April 17, 2026 (EABC): The Ethiopian Agricultural Businesses Corporation (EABC) held discussions today at the Office of the CEO with a delegation from Belarus on potential areas of cooperation with Belarusian companies in the agricultural sector.

The discussions focused on opportunities for collaboration in the assembly of modern agricultural machinery locally to farmers & development organizations at affordable prices, with the aim of strengthening agricultural mechanization in Ethiopia.

The discussion was attended on the EABC side by Chief Executive Officer Mrs. Yeshiemebet Negash & Tekeste Kifle (PhD), Deputy CEO of the Agricultural Machinery & Products Supply Main Sector.

Similarly, the Belarusian delegation included senior official from the Ministry of Agriculture, the Ambassador of Belarus to Kenya & the Head of the Belarusian Consulate Office in Ethiopia.
                        ###
Modernizing agriculture is our goal!

ኮርፖሬሽኑ ከቤላሩስ ኩባንያዎች ጋር በሽርክና ለመሥራት በሚችልባቸው መስኮች ዙሪያ ከሀገሪቱ የልዑካን ቡድን ጋር ተወያየ

አዲስ አበባ፣ ሚያዝያ 9 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን በግብርናው ዘርፍ ከቤላሩስ ኩባንያዎች ጋር በሽርክና ለመሥራት በሚችልባቸው መስኮች ዙሪያ ከሀገሪቱ የልዑካን ቡድን ጋር ሚያዝያ 9 ቀን 2018 ዓ.ም በኮርፖሬሽኑ ዋና ሥራ አስፈጻሚ ጽ/ቤት ተወያየ።

ምክክሩ የቤላሩስ ኩባንያዎች ከኮርፖሬሽኑ ጋር በሽርክና በመሥራት ዘመናዊ የእርሻ መሣሪያዎችን ገጣጥመው ለአርሶ አደሩና ለልማት ድርጅቶች በተመጣጣኝ ዋጋ ማቅረብ በሚችሉበት ሁኔታ ላይ ያተኮረ ነው፡፡

በውይይቱ ላይ በኮርፖሬሽኑ በኩል የተቋሙ ዋና ሥራ አስፈጻሚ ወ/ሮ የሺእመቤት ነጋሽ እና የእርሻ መሣሪያዎችና የግብርና ውጤቶች አቅርቦት ዐቢይ ዘርፍ ምክትል ዋና ሥራ አስፈጻሚ ተከስተ ክፍሌ (ዶ/ር) እንዲሁም የቤላሩስ የግብርና ሚኒስቴር ከፍተኛ የሥራ አመራር፣ በኬንያ የቤላሩስ አምባሳደርና በኢትዮጵያ የቤላሩስ ቆንስላ ጽ/ቤት ኃላፊ ተሳትፈዋል።
                ###
ግብርናን ማዘመን ግባችን ነው!

ኮርፖሬሽኑ ለቀን ሠራተኞች ማእድ አጋራ

አዲስ አበባ፣ መጋቢት 22 ቀን 2018 ዓ.ም (ኢግሥኮ):- የኢትዮጵያ የግብርና ሥራዎች ኮርፖሬሽን ዓለም አቀፍ የሴቶች ቀንን ምክንያት በማድረግ በዋና መ/ቤትና በአዳማ ቅርንጫፍ ለሚያገለግሉ 126 የቀን ሠራተኞች ማእድ አጋራ።

በኮርፖሬሽኑ ዋና መ/ቤት መጋቢት 22 ቀን 2018 ዓ.ም ለተካሄደው ማእድ ማጋራት ከ600 ሺህ ብር በላይ ወጪ የምግብ ዘይትና አልባሳት የተገዛ ሲሆን፣ አይሚ ገዳ የምግብ ኮምፕሌክስ የተባለ ድርጅት በስፖንሰርነት 20 ኩንታል የስንዴ ዱቄት ድጋፍ አድርጓል።

ኮርፖሬሽኑ ወደ ውጭ ገበያ በሚልከው የእጣንና የሙጫ ምርት ዝግጅት ላይ ለተሰማሩ 37 የአዳማ ቅርንጫፍ ሴት የቀን ሠራተኞች ከማእድ ማጋራት በተጨማሪ አልባሳት ተበርክቶላቸዋል።

በዕለቱ የተቋሙ ዋና ሥራ አስፈጻሚ ወይዘሮ የሺእመቤት ነጋሽ ባስተላለፉት መልእክት፣ በሀገረ መንግሥት ግንባታና በሰላም ማስፈን ረገድ የሴቶች ተሳትፎና ጥበብ ከፍተኛ መሆኑን ገልጸው፣ በቀጣይም ሴቶች ከወንድ አጋሮቻቸው ጋር በመሆን የሀገሪቷን ሁለንተናዊ ብልጽግና ለማረጋገጥ የበኩላቸውን አስተዋጽዖ እንዲያበረክቱ አሳስበዋል።

በተለይም ግብርናን በማዘመን የምግብ ሉዓላዊነትን ለማረጋገጥ በሚደረገው ርብርብ ውስጥ የኮርፖሬሽኑ ሴቶች ግንባር ቀደም ሚና እንዲጫወቱ ጥሪ አስተላልፈዋል።

በመርሐ ግብሩ ላይ የተገኙት የአዳማ ቅርንጫፍ ሴት የቀን ሠራተኞች በሰጡት አስተያየት “ተረስተን ነበር፤ አሁን ግን አስታዋሽ በማግኘታችን እናመሰግናለን” ብለዋል።

በኮርፖሬሽኑ የሥርዓተ ጾታ እኩልነትን እና የሴቶችን ተሳትፎና ተጠቃሚነት ለማረጋገጥ የተከናወኑ ተግባራት ሪፖርት በሞያ ደኅንነትና ጤንነት አገልግሎት ቡድን መሪ ወ/ሮ ወይንሸት ገለሶ የቀረበ ሲሆን፣ በሥርዓተ ጾታና ሴቶችን በማብቃት ዙሪያ በሒሩት በቀለ (ዶ/ር) ገለጻ ተደርጓል።
###
50 ዓመት የሴቶች ድምፅ ለእኩልነትና ለበለፀገች ኢትዮጵያ!