ማስታወቂያ

ለክቡራን ደንበኞቻችን ተመራጩን የኬሚካል መርጫ መሣሪያ ማቅረባችንን ስንገልጽ በታላቅ ደስታ ነው።

ለመሆኑ ባልዘመኑ የኬሚካል መርጫ መሣሪያዎች ውድ ጊዜዎን፣ ገንዘብዎን እና ጉልበትዎን አባክነው ይሆን?

በዚህ ረገድ ችግር ካጋጠምዎት አያስቡ፤ አስተማማኝ የጀርመን ቴክኖሎጂ ውጤት የሆነውን ኦሪጅናል “STIHL SR 420” ሞተራይዝድ የአግሮ ኬሚካል መርጫ መሣሪያ በተመጣጣኝ ዋጋ አቅርበንልዎታል።

ከፍተኛ የፈረስ ጉልበትና እስከ 12 ሜትር ድረስ የርጭት አቅም ያለው ይህ ማሽን በእርሻ ቦታዎች፣ በእንስሳት በረቶች እንዲሁም ለተባይ ማጥፊያ ጥቅም ላይ እየዋለ ይገኛል።

​ለአጠቃቀም ቀላል የሆነው ይህ በጀርባ የሚታዘል ማሽን፣ ድካምን በሚቀንስ ሁኔታ የተመረተ ነው።

እኛ ዘንድ ሲመጡ ይህንን በአነስተኛ ኬሚካልና ነዳጅ በአጭር ጊዜ ሰፊ ቦታ የሚሸፍነውን ዘመናዊ የኬሚካል መርጫ መሣሪያ ከእነመለዋወጫው ያገኛሉ።

ከምርታማነት፣ ከዋጋና ጊዜን በአግባቡ ከመጠቀም አኳያ ምርጫዎ “STIHL SR 420” ሞተራይዝድ የኬሚካል መርጫ መሣሪያ ይሁን።

ለበለጠ መረጃ:- በስልክ ቁጥር +251911 433 489 ወይም +251911 157 091 ላይ ይደውሉ።
###
ግብርናን ማዘመን ግባችን ነው!
የኢትዮጵያ የግብርና ሥራዎች ኮርፖሬሽን

የኮርፖሬሽኑ አመራሮች በአለታ ወንዶ አረንጓዴ አሻራቸውን አኖሩ

አለታ ወንዶ፣ ሐምሌ 27 ቀን 2018 ዓ.ም (ኢግሥኮ):- የኢትዮጵያ የግብርና ሥራዎች ኮርፖሬሽን ዋና ሥራ አስፈጻሚ ወ/ሮ የሺእመቤት ነጋሽን ጨምሮ የተቋሙ አመራሮች ከሀዋሳ ቅርንጫፍ ጽ/ቤት ሠራተኞች ጋር በመሆን በሲዳማ ክልል አለታ ወንዶ ወረዳ ሩንጃ ዊቾ የመጀመሪያ ደረጃ ትምህርት ቤት አረንጓዴ አሻራቸውን አኑረዋል።

“በጋራ ተስፋን እንትከል!” በሚል መሪ ቃል በተካሄደው በዚህ የችግኝ ተከላ መርሐ ግብር ላይ የደቡባዊ ሲዳማ ዞን ዋና አስተዳዳሪ፣ የሲዳማ ክልል የብልጽግና ፓርቲ የዴሞክራሲ ግንባታ ዘርፍ ኃላፊ፣ የአለታ ወንዶ ወረዳ አስተዳደር የሥራ ኃላፊዎች እንዲሁም የአካባቢው ነዋሪዎች ተሳትፈዋል።
###
በጋራ ተስፋን እንትከል!

ኮርፖሬሽኑ በሲዳማ ክልል ትምህርት ቤት ለመገንባት የመሠረት ድንጋይ አስቀመጠ

• በክልሉ በልማት ማኅበር ለተደራጁ ሴቶች የወተት ላሞችና ለተማሪዎች የትምህርት ቁሳቁስ ድጋፍ ተደርጓል

---

አለታ ወንዶ፣ ሐምሌ 27 ቀን 2018 ዓ.ም (ኢግሥኮ):- የኢትዮጵያ የግብርና ሥራዎች ኮርፖሬሽን በበጎ አድራጎት የክረምት ሥራዎች በሲዳማ ክልል ደቡባዊ ሲዳማ ዞን አለታ ወንዶ ወረዳ የመዋለ ሕፃናት ት/ቤት ለመገንባት የመሠረት ድንጋይ ሐምሌ 27 ቀን 2018 ዓ.ም አስቀመጠ።

ከዚህ በተጨማሪ ኮርፖሬሽኑ በክልሉ በሴቶች ልማት ቡድን ለተደራጁ እናቶች ዝርያቸው የተሻሻለ ስምንት የወተት ላሞችን የለገሰ ሲሆን፣  ለተማሪዎች የትምህርት ቁሳቁስ ድጋፍ  አድርጓል።

የትምህርት ቤት ግንባታ የመሠረት ድንጋይ ያስቀመጡት የኮርፖሬሽኑ ዋና ሥራ አስፈጻሚ ወይዘሮ የሺእመቤት ነጋሽ፣ ትምህርት ቤቱ በአጭር ጊዜና በጥራት ተገንብቶ ለአገልግሎት እንዲበቃ ኮርፖሬሽኑ በትኩረት ይሠራል ብለዋል።

ከዚህ ጋር በተያያዘ ኮርፖሬሽኑ በአለታ ወንዶ ወረዳ ለሩንጃ ዊቾ አንደኛ ደረጃ ትምህርት ቤት 250 ተማሪዎች 3000 ደብተር፣ 3000 እስክሪብቶ፣ 3000 እርሳስ እና 250 ቦርሳ ድጋፍ አድርጓል።

በሌላ በኩል ከ700 ሺህ ብር በላይ በሆነ ወጪ በደቡባዊ ሲዳማ ዞን ቡርሳ ወረዳ ለሚገኙ በማኅበር ለተደራጁ እናቶች የተደረገው የወተት ላሞች ድጋፍ የሴቶችን ኑሮ ለማሻሻል አስተዋጽዖ እንደሚኖረው ተገልጿል።

ወይዘሮ የሺእመቤት በመልእክታቸው ማጠቃለያ፣ ኮርፖሬሽኑ በደቡባዊ ሲዳማ ዞን ሁለት ወረዳዎች ባከናወናቸው የበጎ አድራጎት ሥራዎች አረንጓዴ አሻራ ከማሳረፍ ባሻገር ለትውልድ ግንባታ ትኩረት በመስጠት ት/ቤት ለመገንባት የመሠረት ድንጋይ ማስቀመጡንና የትምህርት ቁሳቁስ ድጋፍ ማድረጉን እንዲሁም የሌማት ትሩፋት ሥራን መፈጸሙን ተናግረዋል።

በዕለቱ የተገኙት የደቡባዊ ሲዳማ ዞን ዋና አስተዳዳሪ አቶ መንገሻ ፊታሞ፣ የሲዳማ ክልል የብልጽግና ፓርቲ የዴሞክራሲ ግንባታ ዘርፍ ኃላፊ፣ የክልሉ የሴቶችና ወጣቶች ማኅበራዊ ጉዳዮች ቢሮ ኃላፊ፣ የአለታ ወንዶና የቡርሳ ወረዳዎች የሥራ ኃላፊዎች እንዲሁም የአካባቢዎቹ ነዋሪዎች ኮርፖሬሽኑ ላደረገው በጎ ተግባር አመስግነዋል።

በመጨረሻም ለኮርፖሬሽኑ አመራሮች የደቡባዊ ሲዳማ ዞን አካባቢን ባህል የሚያንጸባርቁ ሥጦታዎች ተበርክቶላቸዋል።
              ###
ግብርናን እያዘመንን ማኅበራዊ ኃላፊነትን እንወጣለን!

የኮርፖሬሽኑ የምርጥ ዘር እርሻ ልማት በዘር እየተሸፈነ ነው

አዲስ አበባ፣ ሐምሌ 17 ቀን 2018 ዓ.ም (ኢግሥኮ):- በኢትዮጵያ የግብርና ሥራዎች ኮርፖሬሽን የጎንዴ ኢተያ ምርጥ ዘር ማባዣ እርሻ ልማት በዘር እየተሸፈነ ነው።

በኮርፖሬሽኑ የአሰላ ቅርንጫፍ ጽ/ቤት ሥራ አስኪያጅ አቶ ብርሃኑ የሺጥላ እንደገለጹት፣ በጎንዴ ኢተያ እርሻ እስከ አሁን 282 ሄክታር መሬት በስንዴ፣ በገብስ፣ በጎመን ዘርና በበቆሎ ምርጥ ዘር ተሸፍኗል።

ሰብሎቹ በጥሩ የብቅለት ደረጃ ላይ እንደሚገኙ ያስታወቁት አቶ ብርሃኑ፣ በተመሳሳይ የሽንብራና የጤፍ ሰብል ዝርያዎችን በነሐሴ ወር ለመዝራት የሚያስችል አብዛኛው የመሬት ዝግጅት ሥራ መጠናቀቁን ገልጸዋል።

ቅርንጫፍ ጽ/ቤቱ ዘር ከማባዛት በተጨማሪ አሰላ ከተማ ባለው የዘር ማበጠሪያና ማዘጋጃ ማዕከል አማካኝነት ዘር በማበጠርና በማዘጋጀት ለአርሶ አደሮችና ለሌሎች ተጠቃሚዎች እያቀረበ እንደሚገኝ አቶ ብርሃኑ ተናግረዋል።

ሌላኛው የኮርፖሬሽኑ የአርዳይታ ምርጥ ዘር ማባዣ እርሻ ልማት 3 ሺህ 80 ሄክታር መሬት በ17 አይነት የሰብል ዝርያዎች ሙሉ በሙሉ መሸፈኑን መዘገባችን ይታወሳል።
              ###
ግብርናን ማዘመን ግባችን ነው!

ኮርፖሬሽኑ በማዳበሪያ አቅርቦት ዙሪያ ከሳውዲ የማዕድን ኩባንያ ጋር ተወያየ

አዲስ አበባ፣ ሐምሌ 14 ቀን 2018 ዓ.ም (ኢግሥኮ)፡- የኢትዮጵያ የግብርና ሥራዎች ኮርፖሬሽን የበላይ አመራሮች በአፈር ማዳበሪያ አቅርቦት ዙሪያ የሳውዲ አረቢያ የመንግሥት የልማት ድርጅት ከሆነው የማዕድን ኩባንያ (ማአደን/MA’ADEN) ከፍተኛ የሥራ ኃላፊዎች ጋር በዋናው መሥሪያ ቤት ተወያዩ።

የኮርፖሬሽኑ የግብርና ግብዓት አቅርቦት ዘርፍ ሥራ አስፈጻሚ አቶ በእውቀቱ ያረጋል እንደገለጹት፣ ውይይቱ በዋናነት ያተኮረው ኩባንያው ከኢትዮጵያ መንግሥት ጋር ቀጥተኛ የግዥ ስምምነት (መንግሥት ለመንግሥት/G2G/ ስምምነት) በመፈጸም ለሚቀጥሉት ሦስት ዓመታት የ«ዳፕ» (DAP) አፈር ማዳበሪያን በተሻለ ዋጋና ጥራት ማቅረብ በሚችልበት ሁኔታ ላይ ነው።

በተጨማሪም ኩባንያው ለኢትዮጵያ አርሶ አደሮች በአፈር ማዳበሪያ አጠቃቀምና አተገባበር ዙሪያ የግንዛቤ ማስጨበጫ ሥልጠናዎችን መስጠት በሚችልበት የትብብር መስክ ላይ ምክክር ተደርጓል።

ከኩባንያው ማዳበሪያን በቀጥታ መግዛት በርካታ ዘላቂ ጥቅሞች ያሉት ሲሆን፣ በተለይም ሳውዲ አረቢያ ለኢትዮጵያ ካላት የጂኦግራፊ ቅርበት አኳያ የዳፕ ማዳበሪያን በአጭር ቀናት ውስጥ አጓጉዞ ለአርሶ አደሩ በወቅቱ ለማሰራጨት ያስችላል፡፡

ከዚህ ባሻገር የመጓጓዣ ወጪን ለመቀነስና የጥራት ደረጃን ለመጠበቅ ከፍተኛ ፋይዳ ይኖረዋል።

የሳውዲው ኩባንያ – «ማአደን» በአሁኑ ወቅት ለኮርፖሬሽኑ ማዳበሪያ በማቅረብ ላይ ሲሆን፣ በአሜሪካ፣ እስራኤልና ኢራን ግጭት ምክንያት የሆርሙዝ ሰርጥ በተዘጋበት ወቅት ግብዓቱን በየብስና በቀይ ባሕር በኩል በአማራጭ መንገዶች በማጓጓዝ የአቅርቦት እጥረት እንዳይፈጠር ላደረገው ጥረት ኮርፖሬሽኑ ምስጋና አቅርቦለታል።

በቀጣይ ኩባንያው ከኮርፖሬሽኑ የሥራ አመራር ቦርድና ከግብርና ሚኒስቴር አመራሮች ጋር ከተወያየ በኋላ መደበኛ ስምምነት እንደሚፈረም ይጠበቃል።
###
ግብርናን ማዘመን ግባችን ነው!

ኮርፖሬሽኑ በበጀት ዓመቱ የላቀ አፈጻጸም አስመዘገበ

አዲስ አበባ፣ ሐምሌ 9 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን በ2018 በጀት ዓመት የላቀ የዕቅድ አፈጻጸም አስመዘገበ።

የኮርፖሬሽኑ ሥራ አመራርና የመሠረታዊ የሠራተኛ ማኅበር አመራሮች በተገኙበት ሐምሌ 9 ቀን 2018 ዓ.ም በተቋሙ ዋና መ/ቤት በተካሄደ ዓመታዊ የአፈጻጸም ግምገማ ላይ የበጀት ዓመቱ ዕቅድ አፈጻጸም በአሠራር፣ በገቢና ትርፍ ካለፉት ሦስት ተከታታይ ዓመታት (ከ2015-2017) የተሻለና ከፍተኛ አፈጻጸም የታየበት መሆኑ ተገልጿል።

በተለይም በ2018 በጀት ዓመት ሁለተኛ መንፈቅ ዓመት የለውጥ ሥራዎች በመተግበራቸው በስድስት ወራት ውስጥ ብቻ የውጭ ምንዛሬን ጨምሮ ከፍተኛ ገቢ መገኘቱንና ከትርፍ አኳያም ከታክስ በፊት የተሻለ ትርፍ መመዝገቡን የኮርፖሬሽኑ ዋና ሥራ አስፈጻሚ ወይዘሮ የሺእመቤት ነጋሽ ተናግረዋል።

ለውጤቱ መገኘት በነባራዊ ሁኔታ ላይ በተደረገ የዳሰሳ ጥናት ለተለዩ ተግዳሮቶች የቀረቡ መፍትሔዎች፣ የአሠራር ሥርዓቶች መሻሻል፣ የተቋሙ አመራሮችና ሠራተኞች ቅንጅታዊ አሠራር፣ ከፌደራልና ከክልል የባለድርሻ አካላት ጋር የተፈጠረ የሥራ ግንኙነትና የገበያ ዕድል እንዲሁም ወጪ ቆጣቢ አሠራር በዋናነት እንደሚጠቀሱ ዋና ሥራ አስፈጻሚዋ አብራርተዋል።

ኮርፖሬሽኑ የምግብ ሉዓላዊነትን ለማረጋገጥ በሚደረገው ዘርፈ ብዙ ጥረት ውስጥ የሚጠበቅበትን ድርሻ ለማበርከት፣ የተቋቋመበትን ተግባርና ኃላፊነት በመከለስ የተዘጋጁ ፍኖተ ካርታና ስትራቴጂያዊ ዕቅድ ከ2019 በጀት ዓመት ጀምሮ እንደሚተገበሩ ወይዘሮ የሺእመቤት አስታውቀዋል።

በመጨረሻም ለ2018 በጀት ዓመት ዕቅድ መሳካት የኮርፖሬሽኑን የሥራ አመራር ቦርድ፣ የተቋሙን የሥራ መሪዎችና ሠራተኞች፣ የኢትዮጵያ ኢንቨስትመንት ሆልዲንግስን፣ የግብርና ሚኒስቴርን፣ የኢትዮጵያ የግብርና ትራንስፎርሜሽን ኢንስቲትዩትን፣ የኢትዮጵያ አደጋ ስጋት ሥራ አመራር ኮሚሽንን እንዲሁም ድጋፍ ያደረጉ ሌሎች የፌዴራልና የክልል የባለድርሻ አካላትን አመስግነዋል።
               ###
ግብርናን ማዘመን ግባችን ነው!

የአርዳይታ የምርጥ ዘር እርሻ በዘር ተሸፈነ

አዲስ አበባ፣ ሐምሌ 6 ቀን 2018 ዓ.ም (ኢግሥኮ)፦ በኢትዮጵያ የግብርና ሥራዎች ኮርፖሬሽን የአርዳይታ የምርጥ ዘር ማባዣ እርሻ ልማት 3081 ሄክታር መሬት በዘር ተሸፈነ።

የአርዳይታ ቅርንጫፍ ጽ/ቤቱ ሥራ አስኪያጅ ተወካይ አቶ አዲስ ጋረዶ እንደገለጹት፣ ለ2018/2019 የምርት ዘመን መሬቱን በዘር የመሸፈን ሥራ ሰኔ 9 ቀን ተጀምሮ ሐምሌ 3 ቀን 2018 ዓ.ም ተጠናቋል።

አሁን ላይ በአርዳይታ የምርጥ ዘር ማባዣ እርሻ ልማት 2 ሺህ 541 ሄክታር በስንዴ፣ 525 ሄክታር በጎመን ዘር እና 15 ሄክታር በገብስ የተሸፈነ ሲሆን፣ የዘር ሽፋን ሥራው በሦስት የዘር ደረጃዎችና በ17 ዝርያዎች ተከናውኗል።

በኮርፖሬሽኑ የሚተዳደረው የአርዳይታ የምርጥ ዘር ማባዣ እርሻ ልማት በኦሮሚያ ክልል በምዕራብ አርሲ ዞን ገደብ አሳሳ ወረዳ ይገኛል።
###
ግብርናን ማዘመን ግባችን ነው!

የኮርፖሬሽኑ ተግባርና ኃላፊነት፣ ፍኖተ ካርታና የስትራተጂክ ዕቅድ ላይ ማብራሪያ ተሰጠ

ቢሾፍቱ፣ ሰኔ 30 ቀን 2018 ዓ.ም (ኢግሥኮ)፦ ተሻሽሎ በቀረበው የኢትዮጵያ የግብርና ሥራዎች ኮርፖሬሽን ተግባርና ኃላፊነት እንዲሁም በአዲስ መልክ በተዘጋጀው የኮርፖሬሽኑ ፍኖተ ካርታና የስትራቴጂክ ዕቅድ ላይ ማብራሪያ ተሰጠ።

ማብራሪያው የተሰጠው ሰነዶቹን ባዘጋጀው የኢትዮጵያ የግብርና ትራንስፎርሜሽን ኢንስቲትዩት የጥናት ቡድን ነው።

በኮርፖሬሽኑ ተግባርና ኃላፊነት እንዲሁም በስትራቴጂክ ፍኖተ ካርታና ዕቅድ ዙሪያ ሰሞኑን በተካሄደ ውይይት ላይ በተቋሙ የሥራ አመራር የተነሱ ጥያቄዎችና አስተያየቶች ለኢንስቲትዩቱ አጥኚዎች ቀርበው ምላሽ አግኝተዋል።

በውይይት መድረኩ ላይ በኢትዮጵያ ኢንቨስትመንት ሆልዲንግስ የአግሪካልቸርና አግሮፕሮሰሲንግ ፖርትፎሊዮ ዳይሬክተር አቶ ባንተላይ ስንታየሁ ተገኝተው ሀሳብ ሰጥተዋል።
                ###
ግብርናን ማዘመን ግባችን ነው!

የኮርፖሬሽኑ ተግባርና ኃላፊነት፣ የስትራቴጂክ ፍኖተ ካርታና ዕቅድ ለአስተያየት ቀረቡ

ቢሾፍቱ፣ ሰኔ 28 ቀን 2018 ዓ.ም (ኢግሥኮ)፦ በኢትዮጵያ የግብርና ትራንስፎርሜሽን ኢንስቲትዩት (ATI) የተገመገመ የኢትዮጵያ የግብርና ሥራዎች ኮርፖሬሽን ተግባርና ኃላፊነት (Mandate Assessment) እንዲሁም በኢንስቲትዩቱ የተዘጋጁ የኮርፖሬሽኑ የስትራቴጂክ ፍኖተ ካርታና ዕቅድ (Strategic Roadmap & Plan) ሰኔ 28 ቀን 2018 ዓ.ም ለአስተያየት ቀረቡ።

በኮርፖሬሽኑ የቴክኒክ ኮሚቴ ታይተው ለተቋሙ የሥራ አመራርና የመሠረታዊ የሠራተኛ ማኅበር አመራሮች ለአስተያየት የቀረቡት ሰነዶች፣ ተቋሙ በግብርናው ዘርፍ በመንግሥት የተሰጠውን ተልእኮ በላቀ ደረጃ እንዲያሳካ የሚያግዙ ናቸው።

መድረኩን የመሩት የኮርፖሬሽኑ ዋና ሥራ አስፈጻሚ ወይዘሮ የሺእመቤት ነጋሽ ሲሆኑ፣ በሰነዶቹ ላይ የተሰጡ ግብረ መልሶች ለኢትዮጵያ የግብርና ትራንስፎርሜሽን ኢንስቲትዩት (ATI) ይቀርባሉ።
                ###
ግብርናን ማዘመን ግባችን ነው!