ኮርፖሬሽኑ በጥራት ውድድር የአድናቆት የምስክር ወረቀት አገኘ

አዲስ አበባ፣ ህዳር 22 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን (ኢግሥኮ) ለመጀመሪያ ጊዜ በተሳተፈበት 12ኛው ዙር ሀገር አቀፍ የኢትዮጵያ የጥራት ሽልማት ውድድር ላይ የአድናቆት የምስክር ወረቀት/Honorary Certificate/ አግኝቷል።

የኢፌዴሪ ፕሬዚዳንት ታየ አጽቀ ሥላሴ በተገኙበት ህዳር 20 ቀን 2018 ዓ.ም በብሔራዊ ቤተ መንግሥት በተካሄደው የሽልማት ሥነ ሥርዓት ላይ አቶ አወቀ ደጉ ኮርፖሬሽኑን በመወከል ሽልማቱን ተቀብለዋል። 

        ግብርናን ማዘመን ግባችን ነው!

ለሥራ መሪዎች የኢንተርፕራይዝ ሪሶርስ ፕላኒንግ (ERP) ሥልጠና እየተሰጠ ነው

አዳማ፣ ህዳር 20 ቀን 2018 ዓ.ም (ኢግሥኮ)፦ ለኢትዮጵያ የግብርና ሥራዎች ኮርፖሬሽን የሥራ መሪዎች የኢንተርፕራይዝ ሪሶርስ ፕላኒንግ (ERP) ሥልጠና በአዳማ ኃይሌ ሪዞርት እየተሰጠ ነው ።

“ኤክሲድ አይቲ ሲስተምስ” ከሚባል ኩባንያ ጋር በመተባበር ከህዳር 20 ቀን ጀምሮ ለሁለት ቀናት የተዘጋጀውን ሥልጠና የኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ መልእክት በማስተላለፍ ከፍተዋል።

በዚሁ ወቅት ዋና ሥራ አስፈጻሚዋ እንደተናገሩት፣ የተቋሙን ተልዕኮ ለማሳካት፣ ሀብት በአንድ የመረጃ ቋት ውስጥ መዝግቦ ለማስተዳደር፣ በሀገር ውስጥና በዓለም አቀፍ ገበያ ተወዳዳሪ ሆኖ ለመዝለቅ እና በአጠቃላይ ተቋማዊ ለውጥ ለማምጣት ሥልጠናው መዘጋጀቱን አስታውቀዋል።

ኢ አር ፒን በተሟላ መልኩ ለመተግበር የሥራ መሪዎች ቁርጠኝነት እንደሚያስፈልግ የገለጹት ወ/ሮ የሺእመቤት፣ በኮርፖሬሽኑ በ2011 ዓ.ም የተጀመረው የኢ አር ፒ ሲስተም በሚፈለገው ደረጃ አለመተግበሩን ተናግረዋል።

ይህም የሆነው ፈጻሚው አካልና ሲስተሙ ባለፉት ሰባት ዓመታት በሚጠበቀው ልክ ስላልተገናኙ መሆኑን አስረድተዋል።

በሥልጠናው ላይ የተገኙት አቶ ፍቅሬ ታደገኝ በኢትዮጵያ ኢንቨስትመንት ሆልዲንግስ የሰብስደሪ ትራንስፎርሜሽን ፕሮግራም ተጠባባቂ ዳይሬክተር በበኩላቸው፣ በኮርፖሬሽኑ የኢ አር ፒ ሥርዓት የተዘረጋ ቢሆንም በሁሉም ሥራዎች ላይ ተግባራዊ ባለመደረጉ ክፍተት መፈጠሩን ጠቁመዋል።

አክለውም ዓለም አቀፍ የፋይናንስ ሪፖርት ማቅረቢያ ደረጃዎችን (IFRS) በመተግበር የኮርፖሬሽኑን ሒሳብ በወቅቱ ለመዝጋት ኢ አር ፒን መጠቀም ወሳኝ መሆኑን አስገንዝበው፣ በቴክኖሎጂ የተደገፈ ዘመናዊ አሠራርን ለትውልድ ማስተላለፍ ይገባል ብለዋል።

በዕለቱ “Change Management for Leadership” በሚል ርዕስ ሥልጠና የተሰጠ ሲሆን፣ ሥልጠናውን የሰጡት ወንድወሰን ሙሉጌታ (ዶ/ር) በአዲስ አበባ ዩኒቨርሲቲ የዲጂታላይዜሽንና መሰረተ ልማት ምክትል ፕሬዝዳንት ናቸው።

በሥልጠናው ስለ ኢ አር ፒ ምንነትና ጠቀሜታ እንዲሁም ለውጥ በዲጂታላይዜሽን ዘመን ምን እንደሚመስል ተብራርቷል።

ለውጥን በተቋም ውስጥ ለማስረጽ የአመራሩ ቁርጠኝነት ወሳኝ ነው ያሉት ዶክተር ወንድወሰን፣ ኢ አር ፒ የሰው፣ የቴክኖሎጂና የሂደት (process) ጥምረት በመሆኑ አንዱ ቢጎድል ሲስተሙ ይስተጓጓላል ብለዋል።

የተግባር ሥልጠና የተካተተበት ይህ መርሐ ግብር በነገው ዕለትም ይቀጥላል።

EXCEED IT SYSTEMS በሚባል የሶፍትዌር ማበልጸግና ትግበራ ላይ በተሰማራ ኩባንያ አማካኝነት በኮርፖሬሽኑ የኢ አር ፒ ሲስተም ከተተገበረ ሰባት ዓመታት የተቆጠሩ ሲሆን፣ በቀጣይ ሲስተሙን በሚፈለገው ደረጃ ለማስቀጠል የሚያስችሉ 14 ሞጁሎች ተዘጋጅተዋል።

###

ግብርናን ማዘመን ግባችን ነው!

የአጭዶ መውቂያና ቆሞ መውቂያ ማሽኖች

አዳዲስ የግብርና ቴክኖሎጂዎችን በማስተዋወቅ ግብርናን በማዘመን ላይ የሚገኘው የኢትዮጵያ የግብርና ሥራዎች ኮርፖሬሽን (ኢግሥኮ) በክቡራን ደንበኞቹ ፍላጎት መሰረት ጥራት ያላቸውን ተጨማሪ የስንዴና በቆሎ አጭዶ መውቂያዎችን (Combine harvesters) በብዛት ማስመጣቱን ሲገልጽ በከፍተኛ ደስታ ነው።

የእርሻና የኮንስትራክሽን መሣሪያዎች አምራች ከሆነው ታዋቂው የቻይናው ዙምላየን ኩባንያ ከእነመለዋወጫቸው ያስመጣቸው እነዚህ አጭዶ መውቂያዎች ዋጋቸው ተመጣጣኝ ሲሆን፣ ለአያያዝና አጠቃቀም ምቹ መሆናቸውን ከዚህ ቀደም የተጠቀሟቸው ደንበኞች ይመሰክራሉ።

በተጨማሪም ኮርፖሬሽኑ የስንዴ፣ ገብስ፣ ማሽላ፣ ባቄላ፣ ሽንብራና ምስር ቆሞ መውቂያዎችን (Multi-Crop Threshers) ከቱርክ ሀገር ከእነመለዋወጫቸው በማስመጣት ለተጠቃሚዎች ማቅረቡን ሲያበስር ማሽኖቹ በዘርፉ የሚኖራቸውን ውጤታማነት ከግምት ውስጥ በማስገባት ነው።

ከሽያጭ በኋላ የቴክኒክ ሞያ ሥልጠና፣ የጥገና እና የምክር አገልግሎቶችን ለደንበኞች ስለምንሰጥ በአጠቃቀምና በጥገና ዙሪያ ሀሳብዎን እኛ ላይ ይጣሉ።

እርስዎ ሁሉ ሙሉ፣ ሁሌም ዝግጁ ወደ ሆነው ኮርፖሬሽናችን ጎራ ይበሉ፤ በአገልግሎታችን ተደስተው ይመለሳሉ።

ለበለጠ መረጃ:- +0114 423 438 ወይም 0911 157 091 ወይም 0911 433 489 ላይ ይደውሉ።

###

ግብርናን ማዘመን ግባችን ነው!

የኢትዮጵያ የግብርና ሥራዎች ኮርፖሬሽን

ምርትና ምርታማነታቸው የተረጋገጡ ምርጥ ዘሮች በስፋት እየተባዙ ነው

አዲስ አበባ፤ ህዳር 16/2018(ኢዜአ)፦ የምግብ ዋስትናን ለማረጋገጥ ምርትና ምርታማነታቸው የተረጋገጡ ምርጥ ዘሮችን በስፋት እያበዛ መሆኑን በኢትዮጵያ ግብርና ስራዎች ኮርፖሬሽን የአርዳይታ ቅርንጫፍ ጽህፈት ቤት ገለጸ።

ኮርፖሬሽኑ እንደ ሀገር በግብርናው ዘርፍ የተያዘውን ግብ ዘላቂ በማድረግ ሁሉን አቀፍ ዕድገት ለማረጋገጥ በሚደረገው ጥረት የሚጠበቅበትን አስተዋጽኦ በተግባር እየተወጣ መሆኑ ተመላክቷል።

በኢትዮጵያ ግብርና ስራዎች ኮርፖሬሽን የአርዳይታ ቅርንጫፍ ጽህፈት ቤት ተወካይ ሃላፊ አዲሱ ጋረደው ምርጥ ዘርን በብዛትና በጥራት ማምረት የምግብ ሉዓላዊነትን ለማረጋገጥ ወሳኝ እርምጃ መሆኑን ተናግረዋል።

ቅርንጫፍ ጽህፈት ቤቱ የስንዴ፣ የጎመን እና የገብስ ምርጥ ዝርያዎችን እያባዛ በመላው ሀገሪቱ ተደራሽ በማድረግ ላይ እንደሚገኝ ገልጸዋል።

ቅርንጫፍ ጽህፈት ቤቱ ቅድመ መስራች፣ መስራች እና የተመሰከረለት የተባሉ ምርጥ ዘሮችን ከ 3ሺህ 100 ሄክታር መሬት ላይ እያባዛ መሆኑን ገልጸዋል።

በዚህም ከ 90 ሺህ በላይ ኩንታል ምርት ለማግኘት ማቀዱንም ተናግረዋል።

ሀገር አቀፍ የምግብ ዋስትናን ለማረጋገጥ የተያዘውን ዕቅድ ከግብ ለማድረስ ኮርፖሬሽኑ የሚጠበቅበትን አስተዋጽኦ እያበረከተ መሆኑንም ገልጸዋል።

በቅርንጫፍ ጽህፈት ቤቱ የሚባዛው ምርጥ ዘር ከሁሉም የሀገሪቱ አካባቢዎች የአየር ንብረትና የአፈር ዓይነት ጋር የሚስማማ በመሆኑ የምርት ብክነትን በመቀነስ የሰብል ጥራትን እንደሚያረጋግጥ ተናግረዋል።

ኮርፖሬሽኑ የሚያሰራጫቸው ምርጥ ዘሮች ከፍተኛ ምርት በማስገኘት የአርሶ አደሩን የምርት መጠንና ጥራት የሚያሳድጉ መሆናቸውን ገልጸዋል።

ምርጥ ዘር የግብርና ምርታማነትን ለማሳደግ ዋነኛው መሠረት መሆኑንም ጠቁመዋል።

የአርዳይታ ቅርንጫፍ ጽህፈት ቤት ከፍተኛ የሜካናይዜሽን ባለሙያ አቶ ሠራዊት ጅማ በበኩላቸው፤ የምርት ስብሰባ ሂደቱ በ13 ኮምባይነሮች በመታገዝ እየተከናወነ መሆኑን ተናግረዋል።

ይህም የምርት ብክነትን ለመከላከልና የምርት ጥራትን ለማስጠበቅ ከፍተኛ አስተዋጽኦ እያበረከተ ይገኛል ብለዋል።

ኮርፖሬሽኑ የግብርና ግብዓቶችንና ዘመናዊ የእርሻ መሣሪያዎችን በማቅረብ እንዲሁም የተቀናጀ የሜካናይዜሽን አገልግሎት በመስጠት የምግብ ዋስትናን ለማረጋገጥ የሚጠበቅበትን ሚና እየተጫወተ ይገኛል።

ኮርፖሬሽኑ በ2017/18 የምርት ዘመን ለማባዛት ያቀደው 460 ሺህ ኩንታል ዘር መሆኑም ታውቋል።

የኮርፖሬሽኑ የሩብ ዓመት አፈጻጸም ተገመገመ

አዲስ አበባ፣ ህዳር 9 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን የ2018 በጀት ዓመት የመጀመሪያ ሩብ ዓመት ዕቅድ አፈጻጸም በኢትዮጵያ ኢንቨስትመንት ሆልዲንግስ ተገመገመ።

በኮርፖሬሽኑ ዋና መስሪያ ቤት የመሰብሰቢያ አዳራሽ ህዳር 9 ቀን 2018 ዓ.ም የተደረገውን ግምገማ የመሩት የሆልዲንጉ ከፍተኛ አመራር ወ/ሮ አስማ ረዲ ናቸው።

በግምገማው ወቅት ኮርፖሬሽኑ በምርጥ ዘር አቅርቦት፣ በደን ውጤቶችና ቅባት እህሎች ኤክስፖርት ዝግጅት  አበረታች ተግባራትን ማከናወኑ ተገልጿል።

ይሁንና የግብርና ግብዓትና እርሻ መሣሪያዎች ሽያጭ አፈጻጸምን ለማሻሻል በትኩረት ሊሠራ እንደሚገባ በተሰጠው ግብረ መልስ ተመላክቷል።

የኢትዮጵያ የግብርና ሥራዎች ኮርፖሬሽን በሆልዲንጉ ከፍተኛ ትኩረት ከሚሰጣቸው ጥቂት የመንግሥት የልማት ድርጅቶች አንዱ መሆኑን ያስታወቁት ወይዘሮ አስማ፣ ሆልዲንጉ የኮርፖሬሽኑን አፈጻጸም ለማሻሻል የሚያስችሉ ድጋፎችን ለማድረግ ዝግጁ መሆኑን ተናግረዋል።

አክለውም የተቋሙ አዲስ አመራሮች የኦፕሬሽን ሥራዎችን በአጭር ጊዜ  ተረድተው ስትራቴጂካሊ መምራት መቻላቸው የሚደነቅና የሚበረታታ ተግባር መሆኑን ገልጸዋል።

የኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ በበኩላቸው፣ የኮርፖሬሽኑን ቀጣይነትና ውጤታማነት የሚያረጋግጡ ሥራዎች ጥናትን መሰረት በማድረግ እየተከናወኑ መሆኑን አስረድተዋል።

በዕለቱ ከሆልዲንጉ ለተነሱ ጥያቄዎችና አስተያየቶች በኮርፖሬሽኑ ዋና ሥራ አስፈጻሚና የሥራ ኃላፊዎች ምላሽና ማብራሪያ ተሰጥቷል።
                      ###
    ግብርናን ማዘመን ግባችን ነው!