ኮርፖሬሽኑ እና የኢትዮጵያ አደጋ ስጋት ሥራ አመራር ኮሚሽን በጋራ ለመሥራት ተወያዩ

አዲስ አበባ፣ የካቲት 17 ቀን 2018 ዓ.ም (ኢግሥኮ):-የኢትዮጵያ የግብርና ሥራዎች ኮርፖሬሽን እና የኢትዮጵያ አደጋ ስጋት ሥራ አመራር ኮሚሽን በምግብ እህል ምርትና አቅርቦት በጋራ ለመሥራት በሚችሉባቸው ጉዳዮች ዙሪያ በኮርፖሬሽኑ ዋና መሥሪያ ቤት የካቲት 17 ቀን 2018 ዓ.ም ተወያዩ።

በውይይቱ ወቅት ኮርፖሬሽኑ ኮሚሽኑ በመጠባበቂያ የሚያከማቸውንና ለዕለት ደራሽ እርዳታ የሚያሰራጨውን የምግብ እህል (ስንዴ፣ በቆሎና ሩዝ) አምርቶ እንዲያቀርብ የጋራ መግባባት ላይ ተደርሷል፡፡

ከዚህ ጋር በተያያዘ ከ400 ሚሊዮን ብር በላይ ዋጋ ያለው 54 ሺህ ኩንታል ስንዴ በሽያጭ ለኮሚሽኑ ቀርቧል፡፡

በውይይቱ ላይ የኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ፣ የኮሚሽኑ ኮሚሽነር አምባሳደር ሽፈራው ተክለማርያም (ዶ/ር) እና የሁለቱ ተቋማት ከፍተኛ የሥራ ኃላፊዎች ተገኝተዋል፡፡
###
ግብርናን ማዘመን ግባችን ነው!

የኮርፖሬሽኑ አመራሮችና ሠራተኞች ግብርናን በማዘመን የምግብ ሉዓላዊነትን ለማረጋገጥ እንደሚሠሩ ቃል ገቡ

አዳማ፣ የካቲት 14 ቀን 2018 ዓ.ም (ኢግሥኮ):- የኢትዮጽያ የግብርና ሥራዎች ኮርፖሬሽን አመራሮችና ሠራተኞች ግብርናን በማዘመን የምግብ ሉዓላዊነትን ለማረጋገጥ በቁርጠኝነት እንደሚሠሩ ቃል ገቡ።

ይህ የተገለጸው በኮርፖሬሽኑ የ2018 በጀት ዓመት የመጀመሪያ መንፈቅ ዕቅድ አፈጻጸም፣ በተቋሙ የነባራዊ ሁኔታ የዳሰሳ ጥናትና በሪፎርም ሥራዎች አፈጻጸም ዙሪያ የካቲት 14 ቀን 2018 ዓ.ም በአዳማ ኃይሌ ሪዞርት በተዘጋጀ የውይይት መድረክ ላይ ነው።

በመድረኩ ላይ በሦስት ወቅታዊ የኮርፖሬሽኑ የውይይት አጀንዳዎች ላይ ገለጻ ያደረጉት የተቋሙ ዋና ሥራ አስፈጻሚ ወ/ሮ የሺእመቤት ነጋሽ፣ የተቋሙ አመራሮችና ሠራተኞች በጋራ ከሠሩ የሀገሪቷን የምግብ ሉዓላዊነት በማረጋገጥ ረገድ ግንባር ቀደም ሚና መጫወት ይችላሉ ብለዋል።

ኮርፖሬሽኑ ካሉበት ውስብስብ ችግሮች ተላቆ በመንግሥት የተሰጠውን ተልዕኮ መወጣት እንዲችል የነባራዊ ሁኔታ የዳሰሳ ጥናት መደረጉንና በጥናቱ ምክረ ሀሳብ መነሻም ተቋሙን ወደ ተሻለ የዕድገት ደረጃ የሚያሸጋግሩ የሪፎርም ሥራዎች መጀመራቸውን ጠቁመዋል።

አክለውም ፍኖተ ካርታ እየተዘጋጀ መሆኑንና በቀጣይ የስትራቴጂክ ዕቅድና የቢዝነስ ፕላን ሰነዶች እንደሚዘጋጁ አስታውቀዋል።

የኮርፖሬሽኑ የሥራ መሪዎችና ሠራተኞች የተሻለ ውጤት በማስመዝገብ የተቋሙን ዘላቂ ህልውና እና የገበያ ተወዳዳሪነት ለማረጋገጥ በጋራና በትኩረት መሥራት ይጠበቅባቸዋል ያሉት ዋና ሥራ አስፈጻሚዋ፣ በጥናት የተለዩ ችግሮችን ለመፍታት የተጀመረውን የሪፎርም ሥራ አጠናክሮ ማስቀጠል እንደሚገባ አሳስበዋል።

በውይይት መድረኩ ላይ የተገኙት በኢትዮጵያ ኢንቨስትመንት ሆልዲንግስ የአግሪካልቸርና አግሮፕሮሰሲንግ ፖርትፎሊዮ ዳይሬክተር አቶ ባንተላይ ስንታየሁ፣ ኮርፖሬሽኑ ለምግብ ሉዓላዊነት መረጋገጥና ለሀገር መዋለ ነዋይ እድገት ያለው ሚና ጉልህ መሆኑን ጠቅሰው፣ በዚህ ረገድ ሆልዲንጉ በተለያዩ መስኮች ተቋሙን እንደሚደግፍ አስታውቀዋል።

በውይይቱ ማጠቃለያ በዳሰሳ ጥናቱ ውጤት፣ በሪፎርም ሥራዎችና በቀጣይ አቅጣጫዎች የጋራ መግባባት ላይ የተደረሰ ሲሆን፣ አመራሩና ሠራተኛው ለለውጥ ዝግጁና ቁርጠኛ መሆናቸውን ቃል ገብተዋል።

በውይይቱ ወቅት ለተነሱ ጥያቄዎችና አስተያየቶች በዋና ሥራ አስፈጻሚ፣ በምክትል ዋና ሥራ አስፈጻሚዎች፣ በሌሎች የሥራ ኃላፊዎችና በሆልዲንጉ ተወካይ ምላሽና ማብራሪያ ተሰጥቶአል።
###
ግብርናን ማዘመን ግባችን ነው!

ኮርፖሬሽኑ 18 ትራክተሮችን ለፊንጫ ስኳር ፋብሪካ በሽያጭ አስረከበ

በአዲስ አበባ፣ የካቲት 13 ቀን 2018 ዓ.ም (ኢግሥኮ):- የኢትዮጵያ የግብርና ሥራዎች ኮርፖሬሽን የተለያየ የፈረስ ጉልበት ያላቸውን 18  ትራክተሮችን ለፊንጫ ስኳር ፋብሪካ የካቲት 13 ቀን 2018 ዓ.ም በሽያጭ አስረከበ፡፡

ትራክተሮቹ ዜቶር እና ዲዩዝ ፋር ተብለው የሚታወቁ የአውሮፓ ስሪት ሲሆኑ፣ ከ106 እስከ 166 የፈረስ ጉልበት አላቸው።

በኮርፖሬሽኑ ዋና መስሪያ ቤት በተካሄደው የርክክብ ሥነ ሥርዓት ላይ የኢትዮጵያ ኢንቨስትመንት ሆልዲንግስ ዋና ሥራ አስፈጻሚ ብሩክ ታዬ (ዶ/ር)፣ የኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ፣ የፊንጫ ስኳር ፋብሪካ ዋና ሥራ አስኪያጅ አቶ መንግሥቱ ኃይለማርያም እና ሌሎች የሆልዲንጉና የኮርፖሬሽኑ የሥራ ኃላፊዎች ተገኝተዋል፡፡

ኮርፖሬሽኑ ለደንበኞች ለሚያቀርባቸው የእርሻ መሣሪያዎች በሚሰጠው የድህረ ሽያጭ አገልግሎት መሰረት ለፊንጫ ስኳር ፋብሪካ ትራክተር ኦፕሬተሮችና መካኒኮች የሁለት ቀናት የቴክኒክ ሥልጠና መስጠቱን የኮርፖሬሽኑ የእርሻ መሣሪያዎችና መለዋወጫዎች ማርኬቲንግ መረጃና ቴክኒካል ድጋፍ ሰጪ ቡድን መሪ ወ/ሮ ናፈቁሽ ደሴ ገልጸዋል፡፡

የኢትዮጵያ የግብርና ሥራዎች ኮርፖሬሽን ዘመናዊ እርሻዎችን ለማስፋፋትና ግብርናን ለማዘመን የሚያስችሉ የእርሻ መሣሪያዎችን ከነመለዋወጫቸው  በተመጣጣኝ ዋጋ ለተጠቃሚዎች እያቀረበ ይገኛል፡፡
                   ###
    ግብርናን ማዘመን ግባችን ነው!

ኮርፖሬሽኑ ትላልቅ እርሻዎችን በማስፋፋት የግብርና ምርታማነትን ማሳደግ ላይ ቅድሚያ ሰጥቶ እንዲሠራ የሆልዲንጉ ዋና ሥራ አስፈጻሚ አሳሰቡ

አዲስ አበባ፣ የካቲት 13 ቀን 2018 ዓ.ም (ኢግሥኮ):- የኢትዮጵያ የግብርና ሥራዎች ኮርፖሬሽን ትላልቅ የሜካናይዝድ እርሻዎችን በማስፋፋት የግብርና ምርታማነትን ማሳደግና የሀገሪቷን የምግብ ሉዓላዊነት ማረጋገጥ ላይ ቅድሚያ ሰጥቶ እንዲሠራ የኢትዮጵያ ኢንቨስትመንት ሆልዲንግስ ዋና ሥራ አስፈጻሚ ብሩክ ታዬ (ዶ/ር) አሳሰቡ፡፡

ዋና ሥራ አስፈጻሚው ይህንን ማሳሰቢያ የሰጡት፣ ሆልዲንጉ የተቋሙን የ2018 በጀት ዓመት የመጀመሪያ መንፈቅ የሥራ አፈጻጸም በኮርፖሬሽኑ ዋና መስሪያ ቤት የካቲት 13 ቀን 2018 ዓ.ም በገመገመበት ወቅት ነው፡፡

ዋና ሥራ አስፈጻሚው ኮርፖሬሽኑ በግብርናው ዘርፍ ትልቅ አቅምና የካበተ ልምድ ያለው ተቋም መሆኑን ጠቅሰው፣ በሀገሪቷ ያልታረሰ መሬትን በማልማት ለግብርና ምርት እድገት ከፍተኛውን ድርሻ እንዲወጣ የሥራ መመሪያ ሰጥተዋል፡፡

ይህንን ለማሳካት አዲስ ስትራቴጂ በማዘጋጀት መተግበር እንደሚገባ አስታውቀው፣ የስትራቴጂው ዋና ትኩረትም ግብርናን ማስፋፋት ላይ መሆን እንዳለበት ተናግረዋል፡፡ በዚህ ረገድ ሆልዲንጉ አስፈላጊውን ድጋፍ እንደሚያደርግ አስታውቀዋል፡፡

በዕለቱ የኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ፣ የኮርፖሬሽኑን የስድስት ወራት ዕቅድ አፈጻጸም ከኦፕሬሽን፣ ከገቢና ትርፍ፣ ከኮርፖሬት አስተዳደር፣ ከማኅበራዊ ኃላፊነት እንዲሁም ከሪፎርም ሥራዎች አኳያ አቅርበው የተገመገመ ሲሆን፣ ሆልዲንጉ በበኩሉ የአፈጻጸም ግብረ መልስ አቅርቧል፡፡

በኢትዮጵያ ኢንቨስትመንት ሆልዲንግስ ግምገማ የተሰጡ ግብረ መልሶችን በግብዓትነት በመውሰድ በቀሪ ስድስት ወራት የኮርፖሬሽኑን አፈጻጸም ለማሻሻል ርብርብ እንደሚደረግ የኮርፖሬሽኑ ዋና ሥራ አስፈጻሚ አስታውቀዋል፡፡
                    ###
     ግብርናን ማዘመን ግባችን ነው!

ርዕሰ መስተዳድር አቶ አሻደሊ ሀሰን ከኢትዮጵያ ግብርና ሥራዎች ኮርፖሬሽን ከፍተኛ የስራ ኃላፊዎች ጋር በጽህፈት ቤታቸው ተወያዩ

የካቲት 7/2018 ዓ/ም (አሶሳ) የቤኒሻንጉል ጉሙዝ ክልል ርዕሰ መስተዳድር አቶ አሻደሊ ሀሰን በኢትዮጵያ ግብርና ሥራዎች ኮርፖሬሽን ዋና ስራ አስፈፃሚ ወ/ሮ የሺመቤት ነጋሽ የተመራ ከፍተኛ የተቋሙ አመራሮች ልኡክ ጋር ተወያይተዋል።

በውይይቱ የኢትዮጵያ ግብርና ሥራዎች ኮርፖሬሽን

የግብርናውን ዘርፍ ለማዘመንና ምርትና ምርታማነትን ለመጨመር እየተሰሩ ያሉ ስራዎችን እና የቀጣይ ትኩረት አቅጣጫዎችን አቅርበዋል።

በግብርና ሜካናይዜሽን አቅርቦት፣ በግብር ምርጥ ዘር ልማት፣ በእጣን ምርት ግብይት፣ በእንስሳት ሀብት ልማትና በአግሮ ፕሮሰሲንግ ከክልሉ መንግስት እና ከተለያዩ ማህበራት ጋር ተቀናጅቶ እንደሚሰራ ተመላክቷል።

ተቋሙ በክልሉ ለሚሰራቸው ስራዎች ስኬታማነት የክልሉ መንግስት አስፈላጊውን ድጋፍና እገዛ እንደሚያርግ ርዕሰ መስተዳድር አቶ አሻደሊ ሀሰን ገልጸዋል።

አቶ አሻደሊ አክለውም ተቋሙ ከክልሉ ግብርና ቢሮ ጋር ተናቦና ተቀናጅቶ መስራት እንደሚገባው በመጠቆም በተለይ በሜካናይዜሽን ስራዎች እንቅፋት እየሆነ ያለው የማሽነሪዎች መለዋዎጫ አቅርቦት ትኩረት ሊሰጠው ይገባል ብለዋል።

የኢትዮጵያ ግብርና ሥራዎች ኮርፖሬሽን ዋና ስራ አስፈፃሚ ወ/ሮ የሺመቤት ነጋሽ በበኩላቸው ተቋሙ እንደ ሀገር በተለያዩ ክልሎች የምርጥ ዘር ልማት፣ የማሽነሪዎች አቅርቦቶች፣ በአግሮ ፕሮሰሲንግና የገበያ ትስስሮችን በማመቻቸት ለዘርፉ እድገት እየሰራ መሆኑን በማስታወስ በቤኒሻንጉል ጉሙዝ ክልል ያለውን ምቹ ሁኔታ ተጠቅሞ የተሻለ ስራ ለመስራት ያላቸውን ቁርጠኝነት ገልጸዋል።

ኮርፖሬሽኑና ግሪን አግሮ ሶሉሽን ኩባንያ (‘ለእርሻ’) በጋራ ለመሥራት ተወያዩ

አዲስ አበባ፣ የካቲት 2 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን እና የግሪን አግሮ ሶሉሽን የግል ኩባንያ (‘ለእርሻ’) አመራሮች በግብርናው ዘርፍ  በጋራ መሥራትና ለውጥ ማምጣት በሚችሉባቸው ጉዳዮች ዙሪያ የካቲት 2 ቀን 2018 ዓ.ም ተወያዩ።

በኮርፖሬሽኑ ዋና መ/ቤት በተካሄደው በዚህ ውይይት ላይ የሁለቱ ተቋማት አመራሮች አነስተኛ ማሳ ያላቸውን አርሶ አደሮች በጋራ ለመደገፍ በሚያስችሉ አማራጮች ላይ መክረዋል።

ውይይቱ  በዋነኛነት ዲጂታል ቴክኖሎጂን በመጠቀም የአነስተኛ አርሶ አደሮችን የፋይናንስ አቅም ማሻሻል፣ የግብርና ግብዓቶችና የመካናይዜሸን አገልግሎት ተጠቃሚነትን ማሳደግ እንዲሁም የቴክኖሎጂ አጠቃቀምን በሥልጠና ማጎልበት ላይ ያተኮረ ነበር።  

በውይይቱ ማጠቃለያ የኮርፖሬሽኑ  ዋና ሥራ አስፈጻሚ ወ/ሮ የሺእመቤት ነጋሽ የትብብር ዘርፎችን በዝርዝር የሚያጠናና የስምምነት ሰነድ (MoU) የሚያዘጋጅ የጋራ ኮሚቴ እንዲቋቋም በሰጡት አቅጣጫ መሰረት በኮርፖሬሽኑ በኩል የኮሚቴ አባላት የተሰየሙ ሲሆን፣ በኩባንያው በኩልም እንደሚቋቋም ተገልጿል።

ይህ በእንዲህ እንዳለ የሁለቱ ተቋማት ኮሚቴዎች በትብብር ለመሥራት በሚያስችሉ ጉዳዮች ላይ ከመከሩ በኋላ ተቋማቱ የመግባቢያ ስምምነት (MoU) በቅርቡ እንደሚፈራረሙ ይጠበቃል።

‘ለእርሻ’ – በግሪን አግሮ ሶሉሽን የግል ኩባንያ የተቋቋመ የዲጂታል መድረክ (Platform) ሲሆን፣ ዘመናዊ የመገናኛ ቴክኖሎጂዎችን በመጠቀም አነስተኛ አርሶ አደሮችን ከግብርና ግብዓት (ዘር፣ ማዳበሪያ፣ አግሮኬሚካል) አቅራቢዎች፣ ከመካናይዜሽን አገልግሎት ሰጪዎች፣ ከፋይናንስ ተቋማትና ከገበያ ጋር እንደሚያስተሳስር በውይይቱ ተብራርቷል። ከአየር ንብረት ጋር በተያያዘም የምክር አገልግሎት እንደሚሰጥ ታውቋል።

በአጠቃላይ ‘ለእርሻ’ – ለምርታማነት እድገትና ለቴክኖሎጂ ሽግግር ከፍተኛ አስተዋጽዖ እንደሚያበረክት በውይይቱ ወቅት ተገልጿል።
                   ###
    ግብርናን ማዘመን ግባችን ነው!

ኮርፖሬሽኑ ከክልል የግብርና ቢሮዎችና ከሌሎች ባለድርሻ አካላት ጋር ስትራቴጂያዊ አጋርነት በመፍጠር በግብርናው ዘርፍ ለውጥ ለማምጣት እንደሚሠራ ገለጸ

ወላይታ ሶዶ፣ ጥር 28 ቀን 2018 ዓ.ም (ኢግሥኮ)፦ የኢትዮጵያ የግብርና ሥራዎች ኮርፖሬሽን ከክልል የግብርና ቢሮዎችና ከሌሎች ባለድርሻ አካላት ጋር ስትራቴጂያዊ አጋርነት በመፍጠርና በቅርበት በመሥራት ለግብርና ምርታማነትና ለምግብ ሉዓላዊነት መረጋገጥ እንደሚሠራ የኮርፖሬሽኑ ዋና ሥራ አስፈጻሚ ገለጹ።

ዋና ሥራ አስፈጻሚዋ ወ/ሮ የሺእመቤት ነጋሽ ይህንን የገለጹት፣ በግብርና ግብዓት አቅርቦት ዙሪያ ጥር 28 ቀን 2018 ዓ.ም በወላይታ ሶዶ ከተማ በኃይሌ ሆቴል በተካሄደ የምክክር መድረክ ላይ ነው።

በዚሁ ወቅት እንደተናገሩት፣ ኮርፖሬሽኑ በአርሶ አደሮች ተፈላጊ የሆኑ ዘሮችን እንዲሁም ከአዋጭነት አኳያ በመንግሥትና በግል ዘር አባዥዎች የማይባዙ ዘሮችን አባዝቶ በማቅረብ የልማትና የገበያ ክፍተትን ለመሙላት እንደሚሠራ አስታውቀዋል።

የግብርና ሚኒስትር ዴኤታ አማካሪ የሆኑት አቶ አበራ ለማ በበኩላቸው፣ ኮርፖሬሽኑና የክልል ግብርና ቢሮዎች አንድ የግብርና ቤተሰብ በመሆናቸው ተቀናጅተውና ተናበው በጋራ እንዲሠሩ ጠይቀዋል።

የደቡብ ኢትዮጵያ ክልል የግብርና ቢሮ ኃላፊ መሪሁን ፍቅሩ (ዶ/ር) በበኩላቸው፣ ኮርፖሬሽኑ የግብርና ሞተር መሆኑን ጠቁመው፣ ክልሉ ሰፊ የግብርና አቅም እንዳለው በመግለጽ ኮርፖሬሽኑ በክልሉ ቅርንጫፍ አቋቁሞ በይበልጥ በቅርበት በጋራ እንዲሠራ ጠይቀዋል።

ሌላኛው አስተያየት ሰጪ የማዕከላዊ ኢትዮጵያ ክልል የግብርና ቢሮ ምክትል ኃላፊ አቶ መኮንን ጋሶ እንደተናገሩት፣ ኮርፖሬሽኑ ለክልሉ አርሶ አደሮች የግብርና ግብዓቶችን ለዓመታት በማቅረብ ባለውለታ ተቋም ነው። ለዚህም ምስጋናና ክብር እንዳላቸው ገልጸው፣ በቀጣይም አብሮ ለመሥራት ዝግጁነታቸውን አረጋግጠዋል።

በተመሳሳይ የሀዲያ ዞን የግብርና ግብዓት ቡድን መሪ አቶ ሳልማን ኤርገኖ በሰጡት አስተያየት፣ ኮርፖሬሽኑ በዘር ጥራት ምሳሌ እንደሆነና ከዚህም የተነሳ በአካባቢው አርሶ አደሮች ተመራጭ መሆኑን ተናግረዋል።

በሌላ በኩል ኮርፖሬሽኑ የመስክ የሰርቶ ማሳያ በማዘጋጀት የዘር ማስተዋወቅ ሥራን አጠናክሮ እንዲቀጥል፣ አዳዲስ የዘር ዝርያዎችን በማባዛት እንዲያቀርብ፣ አግሮኬሚካሎችን በስፋት በማቅረብ ገበያውን እንዲያረጋጋ እንዲሁም የግብዓት ማዕከላትን በተለያዩ አካባቢዎች በመገንባት አገልግሎቱን ይበልጥ ተደራሽ እንዲያደርግ የውይይቱ ተሳታፊዎች አስተያየት ሰጥተዋል።

በዕለቱ የኮርፖሬሽኑ ምክትል ዋና ሥራ አስፈጻሚ ወ/ሮ ፍሬሕይወት ጠምስ እና በኮርፖሬሽኑ የምርጥ ዘር አቅርቦት ዘርፍ የዘር ምርት ዝግጅትና ሥርጭት መምሪያ ሥራ አስኪያጅ አቶ ማሩ ደገፋ ለውይይት መነሻ የሚሆን ገለጻ አቅርበዋል።

በውይይቱ ላይ ከሲዳማ፣ ከማዕከላዊ ኢትዮጵያና ከደቡብ ኢትዮጵያ ክልሎች የግብርና ቢሮዎች እንዲሁም ከኦሮሚያ ክልል የምዕራብ አርሲ ዞን የግብርና መምሪያዎች የተውጣጡ ከፍተኛ አመራሮች፣ የዘር ጥራት ተቆጣጣሪዎችና የአርሶ አደሮች የኅብረት ሥራ ማኅበራት ሥራ አስኪያጆች ተገኝተዋል።
                    ###
    ግብርናን ማዘመን ግባችን ነው!

EABC Board of Directors Conducts Field Visit and Reviews First-Half Performance

Addis Ababa, February 1, 2026 (EABC):The Board of Directors of the Ethiopian Agricultural Businesses Corporation (EABC) conducted a field visit on February 1, 2026 to assess the Corporation’s agricultural machinery supply operations.

Following the visit, the Board held a review meeting on the Corporation’s performance for the first half of the 2018 Ethiopian fiscal year.

During the session, the Corporation’s Chief Executive Officer, Mrs. Yeshiembet Negash presented the half-year performance report for discussion.

Since September 23, 2025 the Corporation has been led by the following Board Chairperson, Vice Chairperson and Members:

Mrs. Alemtsehay Paulos – Head of the Prime Minister’s Office and Minister of Cabinet Affairs – Board Chairperson

Mr. Addisu Arega – Minister of Agriculture –  Vice Chairperson of the Board

Mrs. Semereta Sewasew – State Minister of Finance – Board Member

Eyob Tekalign (PhD) – Governor of the National Bank of Ethiopia – Board Member

Mr. Abie Sano – President, Commercial Bank of Ethiopia – Board Member

Takele Uma (Eng.) – CEO of Ethio–Djibouti Railways Transport Share Company – Board Member

Mandefiro Niguse (PhD) – Director General, Ethiopian Agricultural Transformation Institute – Board Member

Mr. Kiya Tekalign – from Ethiopian Investment Holdings – Board Member

Mr. Daniel Silesh – Employees’ Representative – Board Member

               Modernizing Agriculture Is Our Goal!

የሥራ አመራር ቦርድ ኮርፖሬሽኑን ጎበኘ

አዲስ አበባ፣ ጥር 24/2018 ዓ.ም (ኢግሥኮ):- የኢትዮጵያ የግብርና ሥራዎች ኮርፖሬሽን የሥራ አመራር ቦርድ የተቋሙን የእርሻ መሣሪያዎች አቅርቦት ጥር 24 ቀን 2018 ዓ.ም ጎበኘ።

ከጉብኝቱ በኋላ የኮርፖሬሽኑን የ2018 በጀት ዓመት የመጀመሪያ መንፈቅ የሥራ አፈጻጸም እየገመገመ ነው።

የተቋሙ የግማሽ ዓመት የሥራ አፈጻጸም ሪፖርት በኮርፖሬሽኑ ዋና ሥራ አስፈጻሚ ወ/ሮ የሺእመቤት ነጋሽ ለውይይት ቀርቧል።

ከመስከረም 13 ቀን 2018 ዓ.ም ጀምሮ ኮርፖሬሽኑን በሥራ አመራር ቦርድ ሰብሳቢነት፣ በምክትል ሰብሳቢነትና በአባልነት እየመሩ የሚገኙት:-

ወ/ሮ ዓለምፀሀይ ጳውሎስ – የጠቅላይ ሚኒስትር ጽ/ቤት ኃላፊና የካቢኔ ጉዳዮች ሚኒስትር –  የቦርድ ሰብሳቢ

አቶ አዲሱ አረጋ – የኢፌዴሪ የግብርና ሚኒስትር – የቦርድ ምክትል ሰብሳቢ

ወ/ሮ ሰመሪታ ሰዋሰው – በኢፌዴሪ የገንዘብ ሚኒስቴር የኢኮኖሚ ትብብር ዘርፍ ሚኒስትር ዴኤታ – የቦርድ አባል

ኢዮብ ተካልኝ (ዶ/ር) – የኢትዮጵያ ብሔራዊ ባንክ ገዥ – የቦርድ አባል

አቶ አቤ ሳኖ – የኢትዮጵያ ንግድ ባንክ ፕሬዚዳንት  – የቦርድ አባል

ታከለ ኡማ (ኢ/ር) – የኢትዮ – ጂቡቲ የምድር ባቡር ትራንስፖርት አክሲዮን ማኅበር ዋና ሥራ አስፈጻሚ – የቦርድ አባል

ማንደፍሮ ንጉሤ (ዶ/ር) – የኢትዮጵያ የግብርና ትራንስፎርሜሽን ኢንስቲትዩት ዋና ዳይሬክተር – የቦርድ አባል

አቶ ኪያ ተካልኝ – ከኢትዮጵያ ኢንቨስትመንት ሆልዲንግስ – የቦርድ አባል አቶ ዳንኤል ስለሺ – በኮርፖሬሽኑ ሠራተኞች የተመረጡ – የቦርድ አባል ናቸው።