የኢትዮጵያ የግብርና ሥራዎች ኮርፖሬሽን የ2016 በጀት ዓመት ዕቅድ አፈጻጸም የተቋሙ የማኔጅመንት አባላት እና የቅርንጫፍ ጽ/ቤቶች ሥራ አስኪያጆች በተገኙበት እየተገመገመ ነው።
ግምገማው በነገው ዕለትም የሚቀጥል ሲሆን፣ ነገ የኮርፖሬሽኑ የ2017 በጀት ዓመት ዕቅድ ቀርቦ ውይይት ይደረጋል።
###
ግብርናን ማዘመን ግባችን ነው! ሐምሌ 16 ቀን 2016 ዓ.ም
ኮርፖሬሽኑ በአዲስ አበባ ያስገነባውን የአቅመ ደካማ መኖሪያ ቤት አስመረቀ
* በሌላ ዜና ለኮርፖሬሽኑ የውስጥ አገልግሎት የሚውሉ የዳቦ መጋገሪያ እና የጉድጓድ ውኃ ፕሮጀክቶች ተመርቀዋል
አዲስ አበባ፣ ሐምሌ 16 ቀን 2016 ዓ.ም (ኢግሥኮ)፡- የኢትዮጵያ የግብርና ሥራዎች ኮርፖሬሽን በአዲስ አበባ አቃቂ ቃሊቲ ክፍለ ከተማ ወረዳ 6 ያስገነባውን የአቅመ ደካማ መኖሪያ ቤት ሐምሌ 16 ቀን 2016 ዓ.ም አስመረቀ። ወይዘሮ አስናቀች ፀጋ ለተባሉ የወረዳ 6 ነዋሪ ከ1 ሚሊየን ብር በላይ ወጪ የተገነባውን መኖሪያ ቤት በመመረቅ ቁልፍ የአስረከቡት የኮርፖሬሽኑ ዋና ሥራ አስፈጻሚ አቶ ክፍሌ ወልደማርያም እና በአቃቂ ቃሊቲ ክፍለ ከተማ የወረዳ 6 አስተዳደር ዋና ሥራ አስፈጻሚ አቶ ቶፊቅ ከድር ናቸው። በዚሁ ወቅት ንግግር የአደረጉት የኮርፖሬሽኑ ዋና ሥራ አስፈጻሚ፣ ኮርፖሬሽኑ የሕዝብ ተቋም እንደመሆኑ ለሕዝብ ያለውን አጋርነት ለማረጋገጥ ማኅበራዊ ኃላፊነቱን በመወጣት ላይ ይገኛል ብለዋል። ኮርፖሬሽኑ ባለፉት ዓመታት ለበርካታ ዜጎች የሥራ እድል በመፍጠር እና ከሚያገኘው ትርፍ ላይ በየዓመቱ ለማኅበራዊ ኃላፊነት በጀት በመመደብ በተለያዩ አካባቢዎች ለበርካታ ማኅበረሰቦች የገንዘብ እና የቁሳቁስ ድጋፎችን ሲያደርግ መቆየቱን አቶ ክፍሌ አብራርተዋል፡፡ አክለውም ኮርፖሬሽኑ በ2016 በጀት ዓመት የአረንጓዴ አሻራ መርሐ ግብርን ከማስቀጠል ባሻገር ለተለያዩ የክረምት የበጎ ፈቃድ አገልግሎቶች ከ16 ሚሊየን ብር በላይ ማውጣቱን ጠቁመው፣ ከአከናወናቸው ሥራዎች አንዱ የወይዘሮ አስናቀች ፀጋ መኖሪያ ቤት ግንባታ መሆኑን አስታውቀዋል። የወረዳ 6 አስተዳደር ዋና ሥራ አስፈጻሚ አቶ ቶፊቅ ከድር በበኩላቸው፣ ከኮርፖሬሽኑ ጋር በመተባበር በርካታ ሰው ተኮር የሆኑ ሥራዎችን እያከናወኑ እንደሚገኙ ጠቁመው፣ ኮርፖሬሽኑ የአስገነባው የአስፋልት መንገድ፣ አጥር እና ሌሎች የግቢ ማስዋብ ሥራዎች የአካባቢውን ገጽታ በተሻለ መልኩ መቀየራቸውን ተናግረዋል፡፡ ኮርፖሬሽኑ አርሶ አደሩን ብቻ ሳይሆን የከተማ ነዋሪዎችንም ጭምር ተጠቃሚ የሚያደርጉ በርካታ ሥራዎችን እያከናወነ እንደሚገኝ የገለጹት አቶ ቶፊቅ፣ የአቅመ ደካማ ቤት እድሳት ሥራ፣ የውኃ እና ጎርፍ ማፋሰሻ ተግባራት ለዚህ ተጠቃሽ ናቸው ብለዋል፡፡ በዚህ የተነሳም የአካባቢው ነዋሪ ኮርፖሬሽኑን እንደ እራሱ ንብረት እያየው ይገኛል ብለዋል። በኮርፖሬሽኑ የውስጥ አቅም የተገነባው የወይዘሮ አስናቀች መኖሪያ ቤት በብሎኬት የተሰራ ሲሆን፣ የቀድሞውን እድሜ ጠገብ አሮጌ ቤት አፍርሶ ለመገንባት የሦስት ወራት ጊዜ ወስዷል፡፡ 7መኖሪያ ቤቱ ማብሰያ ቤትን ጨምሮ አራት ክፍሎች ያሉት ሲሆን፣ የቤት ውስጥ ቁሳቁስ ተሟልቶለታል፡፡ በመርሐ ግብሩ ማጠቃለያ ኮርፖሬሽኑ በ2016 በጀት ዓመት በአቃቂ ቃሊቲ ክፍለ ከተማ ለአበረከተው የልማት አስተዋጽዖ ከክፍለ ከተማው የምስጋና የምስክር ወረቀት ተበርክቶለታል። በሌላ ዜና ለኮርፖሬሽኑ የውስጥ አገልግሎት የሚውሉ የዳቦ መጋገሪያ እና የጉድጓድ ውኃ ፕሮጀክቶች ሐምሌ 16 ቀን 2016 ዓ.ም ተመርቀዋል። የውኃ ፕሮጀክቱ በተደጋጋሚ ያጋጥም የነበረን የውኃ እጥረት ያቃለለ ሲሆን፣ ዳቦ ቤቱ ደግሞ ለኮርፖሬሽኑ ሠራተኞች በተመጣጣኝ ዋጋ አገልግሎት እየሰጠ ይገኛል። በቀጣይም ለአካባቢው ማኅበረሰብ ዳቦ እና እንቁላል ለማቅረብ ታስቧል።
ግብርናን ከማዘመን ጎን ለጎን ማኅበራዊ ኃላፊነትን በመወጣት ለሕዝብ ያለንን አጋርነት እናረጋግጣለን!
ኮርፖሬሽኑ የISO 9001:2015 የጥራት ሥራ አመራር ሥርዓት የሙከራ ትግበራ ጀመረ
* “የዛሬው ዕለት ለኮርፖሬሽኑ ታሪካዊ ቀን ነው” የኮርፖሬሽኑ ዋና ሥራ አስፈጻሚ
* “የሀገሪቱ የምጣኔ ሀብት እድገት የጀርባ አጥንት ለሆነ ተቋም የጥራት ሥራ አመራር ሥርዓት እንዲተገብር የማማከር እና የመደገፍ ሥራ እያከናወንን በመሆኑ ታላቅ ደስታ እና ኩራት ይሰማናል” የኢትዮጵያ ደረጃዎች ኢንስቲትዩት ዋና ዳይሬክተር
አዲስ አበባ፣ ሐምሌ 15 ቀን 2016 ዓ.ም (ኢግሥኮ)፡- የኢትዮጵያ የግብርና ሥራዎች ኮርፖሬሽን የISO 9001:2015 የጥራት ሥራ አመራር ሥርዓት የሙከራ ትግበራ ጀመረ፡፡
በኮርፖሬሽኑ የስብሰባ አዳራሽ ሐምሌ 15 ቀን 2016 ዓ.ም በተካሄደ የጥራት ሥራ አመራር ሥርዓት የሙከራ ትግበራ ማስጀመሪያ መርሐ ግብር፣ የኮርፖሬሽኑ ዋና ሥራ አስፈጻሚ አቶ ክፍሌ ወልደማርያም እንደተናገሩት፣ ዕለቱ ኮርፖሬሽኑ የISO 9001:2015 የጥራት ሥራ አመራር ሥርዓትን በመተግበር ከዓለም አቀፍ ተቋማት መካከል አንዱ የሚያደርገው ታሪካዊ ቀን ነው ብለዋል፡፡አክለውም ሁሉም የሥራ መሪዎች እና ሠራተኞች የአሠራር ሥርዓቱ ሙሉ በሙሉ ተግባራዊ እንዲሆን በቁርጠኝነት በመስራት አሻራቸውን እንዲያኖሩ የሥራ መመሪያ ሰጥተዋል፡፡አያይዘውም የአሠራር ሥርዓቱን ተግባራዊ ለማድረግ በተከናወኑ ሥራዎች ላይ አስተዋጽዖ ለአበረከቱ በሙሉ ምስጋና አቅርበዋል፡፡
በሙከራ ትግበራ ማስጀመሪያ ሥነ ሥርዓቱ ላይ የተገኙት የኢትዮጵያ የደረጃዎች ኢንስቲትዩት ዋና ዳይሬክተር መሰረት በቀለ (ዶ/ር) በበኩላቸው፣ “የሀገሪቱ የምጣኔ ሀብት እድገት የጀርባ አጥንት ለሆነ ተቋም የISO 9001:2015 የጥራት ሥራ አመራር ሥርዓት እንዲተገብር የማማከር እና የመደገፍ ሥራ እያከናወንን በመሆኑ ታላቅ ደስታ እና ኩራት ይሰማናል” በማለት ተናግረዋል፡፡አክለውም ኮርፖሬሽኑ የሰነድ ሥራዎችን እና ሌሎች ቅድመ ዝግጅቶችን በአጭር ጊዜ አከናውኖ ወደ ሙከራ ትግበራ መግባቱ የሚደነቅ መሆኑን ጠቁመው፣ የተቋሙን ሥራ አመራር እና ሠራተኞች እንኳን ደስ ያላችሁ ብለዋል፡፡ ISO 9001:2015 የጥራት ሥራ አመራር ሥርዓትን ለመተግበር ከፍተኛ ቁርጠኝነት እንደሚጠይቅ የገለጹት ዋና ዳይሬክተሯ፣ በዚህ ረገድ የኮርፖሬሽኑ አመራሮች እና ሠራተኞች ያላቸው ቁርጠኝነት የሚደነቅ መሆኑን ተናግረዋል፡፡ የጥራት ሥራ አመራር ሥርዓትን መተግበር በትርፋማነት እና አሠራር ላይ ከፍተኛ ለውጥ ያመጣል ያሉት ዋና ዳይሬክተሯ፣ ተቋማቸው ኮርፖሬሽኑ የአሠራር ሥርዓቱን ሙሉ በሙሉ እንዲተገብር በተለየ ሁኔታ ድጋፉን አጠናክሮ እንደሚቀጥል አረጋግጠዋል፡፡ የሙከራ ትግበራ ሥራው እስከ መስከረም 30 ቀን 2017 ዓ.ም የሚቆይ ሲሆን፣ የኮርፖሬሽኑ ሠራተኞች ሥርዓቱን ተግባራዊ ለማድረግ ዝግጁ እና ቁርጠኛ መሆናቸውን በሰጡት አስተያየት አስታውቀዋል፡፡ ይህ በእንዲህ እንዳለ በዕለቱ መርሐ ግብር የISO ዶክመንት ርክክብ የተደረገ ሲሆን፣ ሰነዶቹን ለአራት የዘርፍ ኃላፊዎች የአስረከቡት የኮርፖሬሽኑ ዋና ሥራ አስፈጻሚ አቶ ክፍሌ ወልደማርያም ናቸው፡፡ በሌላ በኩል ከኮርፖሬሽኑ ዋና መ/ቤት እና ከቅርንጫፍ ጽ/ቤቶች ተውጣተው የISO 9001:2015 የጥራት ሥራ አመራር ሥርዓት የአተገባበር ሥልጠና የወሰዱ 39 ሠራተኞች ከኢትዮጵያ የደረጃዎች ኢንስቲትዩት ዋና ዳይሬክተር መሰረት በቀለ (ዶ/ር) እጅ የምስክር ወረቀት ተቀብለዋል፡፡
###
የጥራት ሥራ አመራር ሥርዓትን በመተግበር ግብርናን የማዘመን ግባችንን እናሳካለን!
ኮርፖሬሽኑ ሮቤ ከተማ ላይ ያስገነባው የአቅመ ደካማ መኖሪያ ቤት ተመረቀ
ሮቤ፣ ሐምሌ 13 ቀን 2016 ዓ.ም (ኢግሥኮ)፡- የኢትዮጵያ የግብርና ሥራዎች ኮርፖሬሽን በባሌ ሮቤ ከተማ 1 ሚሊየን ብር በሚጠጋ ወጪ ያስገነባው የአቅመ ደካማ መኖሪያ ቤት ሐምሌ 13 ቀን 2016 ዓ.ም ተመርቆ የቁልፍ ርክክብ ተፈጽሟል።
ኮርፖሬሽኑ መኖሪያ ቤቱን ያስገነባው በሮቤ ከተማ በሃቢፍቱ ቀበሌ ነዋሪ ለሆኑት ወይዘሮ መክዳ አብዱራሂም ነው።
በምረቃ እና በቁልፍ ርክክብ መርሐ ግብሩ ላይ የተገኙት የኮርፖሬሽኑ ዋና ሥራ አስፈጻሚ አቶ ክፍሌ ወልደማርያም በአደረጉት ንግግር፣ ኮርፖሬሽኑ የሕዝብ ተቋም እንደመሆኑ ለሕዝብ ያለውን አጋርነት ለማረጋገጥ ማኅበራዊ ኃላፊነቱን በመወጣት ላይ ይገኛል ብለዋል።
በዕለቱ ዋና ሥራ አስፈጻሚው ከሮቤ ከተማ አስተዳደር ከፍተኛ አመራሮች ጋር በመሆን መኖሪያ ቤቱን መርቀው ለወይዘሮ መክዳ አብዱራሂም ቁልፍ አስረክበዋቸዋል። ኮርፖሬሽኑ ባለፉት ዓመታት ለበርካታ ዜጎች የሥራ እድል በመፍጠር እና ከሚያገኘው ትርፍ ላይ በየዓመቱ ለማኅበራዊ ኃላፊነት በጀት በመመደብ በተለያዩ አካባቢዎች ለበርካታ ማኅበረሰቦች የገንዘብ እና የቁሳቁስ ድጋፎችን ሲያደርግ መቆየቱን አቶ ክፍሌ አብራርተዋል፡፡
አክለውም ኮርፖሬሽኑ በ2016 በጀት ዓመት የአረንጓዴ አሻራ መርሐ ግብርን ከማስቀጠል ባሻገር ለተለያዩ የክረምት የበጎ ፈቃድ አገልግሎቶች ከ16 ሚሊየን ብር በላይ ማውጣቱን ጠቁመው፣ ኮርፖሬሽኑ ከአከናወናቸው ሥራዎች አንዱ የወይዘሮ መክዳ አብዱራሂም መኖሪያ ቤት ግንባታ መሆኑን አስታውቀዋል።
በቀጣይም የኮርፖሬሽኑ የፋይናንስ አቅም እየታየ ተጨማሪ የበጎ ፈቃድ ሥራዎችን በተለያዩ የሀገሪቷ አካባቢዎች ለማከናወን ጥረት እንደሚደረግ ቃል ገብተዋል። በኮርፖሬሽኑ የውስጥ አቅም በ885 ሺህ 197 ብር ወጪ በ63 ካሬ ሜትር ቦታ ላይ የተገነባው የወይዘሮ መክዳ መኖሪያ ቤት በብሎኬት የተሰራ ሲሆን፣ ከተገነባ 48 ዓመታት ሞልቶት የነበረውን የቀድሞውን አሮጌ ቤት አፍርሶ ለመገንባት 55 ቀናት ወስዷል፡፡ በአዲስ መልክ የተገነባው ይህ መኖሪያ ቤት ሳሎን እና ሁለት የመኝታ ክፍሎች ያሉት ሲሆን፣ የቤት ውስጥ ቁሳቁስም ተሟልቶለታል፡፡ በሀገር ሽማግሌዎች እና በአባ ገዳዎች ምርቃት የተጀመረው የዕለቱ የምረቃ እና የቁልፍ ርክክብ ሥነ ሥርዓት የሮቤ ከተማ አስተዳደር የበሃቢፍቱ ቀበሌ መስተዳድር ለኮርፖሬሽኑ የበላይ አመራሮች የጋቢ ሥጦታ አበርክቶ ተጠናቋል። በተመሳሳይ ዜና ኮርፖሬሽኑ በአዲስ አበባ ከተማ አቃቂ ቃሊቲ ክፍለ ከተማ ወረዳ 6 ያስገነባውን ተጨማሪ የአቅመ ደካማ መኖሪያ ቤት ሐምሌ 16 ቀን 2016 ዓ.ም እንደሚያስመርቅ ይጠበቃል። ግብርናን ከማዘመን ጎን ለጎን ማኅበራዊ ኃላፊነታችንን በመወጣት ለሕዝብ ያለንን አጋርነት እናረጋግጣለን!
